Сөүл хотод сүүлийн 117 жилийн хугацаанд ороогүй их цас оржээ

Лхагва гарагт Өмнөд Солонгосын нийслэл Сөүл хот зузаан цасанд дарагдсаны улмаас замын хөдөлгөөний нөхцөл байдал хүндэрсэн байна.

Тус хотын зарим хэсэгт цасны зузаан 20 см давсан нь сүүлийн 117 жилийн хугацаанд тохиолдоогүй ховор үзэгдэл болжээ.

Сөүл болон түүний ойр орчмын нутагт өнөөдөр цас үргэлжлэн орох төлөвтэй байна.

Өчигдөр тус улсын Гамшгаас Хамгаалах Төв гурван зэрэглэлтэй цасны эрсдэлийн түгшүүрийг эхлээд нэгдүгээр түвшинд зарласан бол үдээс хойш хоёрдугаарт шилжүүлэн ахиулжээ.

1907 оны аравдугаар сард Сөүл хотод орчин үеийн цаг уурын ажиглалтын систем ажиллаж эхэлсэн түүхтэй.

Тэгвэл уг ажиглалт эхэлснээс хойш жил бүрийн арваннэгдүгээр сард ийм хэмжээний цас орж байгаагүйг цаг уурчид мэдээлжээ.

Өмнөх хамгийн дээд үзүүлэлт нь 1972 оны арваннэгдүгээр сарын 28-ны өдөр орсон цасны зузаан 12.4 см хүрсэн тохиолдол байсан байна.

Их цасны улмаас өчигдөр Сөүл хотод 150 гаруй зам тээврийн ослын дуудлага бүртгэгджээ.

Сонбук дүүрэгт цасанд дарагдсан мод цахилгааны кабелийн дээр унаж гэмтээснээс 200 орчим айл эрчим хүчгүй болсон байна.

Өчигдөр бас дотоодын болон олон улсын 40 гаруй нислэг цуцлагдаж, 200 орчим нислэг хойшлогдсоныг Инчоны Олон Улсын Нисэх Буудал Корпорац мэдээлжээ.

Өглөө зорчигчдын ачаалал хэт нэмэгдсэний улмаас Сөүлийн метроны 9 дүгээр шугамд есөн минут саатал үүссэн байна.

Эх сурвалж: Yonhap News