МҮХАҮТ-ын ерөнхийлөгчөөр "Цахим байшин" ХХК-ийн ТУЗ-ийн гишүүн Л.Төр-Од сонгогджээ

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын Үндэсний Худалдаа Аж Үйлдвэрийн Танхимын XXII их хурал өнөөдөр UG Palace Event Hall-д боллоо.

Уг их хурлаараа танхимын гишүүд шинэ ерөнхийлөгчөө сонгов. Анхлан есөн хүн нэрээ дэвшүүлсэн ч “Монгол брэнд холбоо” ТББ-ын тэргүүн Ш.Отгон-Өлзий, “Коёотэ” ХХК-ийн Ерөнхий захирал Д.Бямбасайхан нар нэрээ татсанаар 

1. “Дабльхилл” ХХК-ийн Ерөнхий захирал Ш.Төмөрсүх
2. “ОУХЛТөв” ХК-ийн ТУЗ-ийн гишүүн Т.Дүүрэн
3. “Таванбогд” ХХК-ийн Ерөнхий захирал Ц.Баатарсайхан
4. “Урбанек” ХХК-ийн Ерөнхий захирал Б.Лхагважав
5. “Офис констракшн” ХХК-ийн хувьцаа эзэмшигч Б.Лакшми
6. “АСҮТ-Боломж” ХХК-ийн Ерөнхий захирал Ц.Майдар
7. “Цахим байшин” ХХК-ийн ТУЗ-ийн гишүүн Л.Төр-Од нар өрсөлдөхөөр болж, өөрсдийн хэрэгжүүлэхээр зорьж буй мөрийн хөтөлбөрөө танилцуулсан.

Гишүүдийн санал хураалтын үр дүнд 50-аас дээш хувийн санал авсан хүн байгаагүй тул хамгийн олон санал авсан хоёр нэр дэвшигч буюу Л.Төр-Од, Ц.Баатарсайхан нарын хооронд дахин санал хураалаа. Улмаар 54 хувийн саналаар Л.Төр-Од МҮХАҮТ-ын ерөнхийлөгчөөр сонгогдсон байна.

МҮХАҮТ-ын ерөнхийлөгч нь танхимын Удирдах зөвлөлийн дарга байх бөгөөд Үндэсний танхимыг гадаад, дотоодод төлөөлөх, Удирдах зөвлөлөөс олгосон болон Дүрэмд заасан эрх хэмжээний хүрээнд танхимын үйл ажиллагааг удирдан чиглүүлэх, танхимын олон улсын хамтын ажиллагааг идэвхжүүлэх, УИХ, Засгийн газар, төрийн болоод төрийн бус байгууллагуудтай гишүүд, бизнес эрхлэгчдийн эрх ашгийг төлөөлөн хамгаалах асуудлаар хамтарч ажиллах үндсэн чиг үүрэгтэй юм.