"Мянгад сумын иргэд Халзан бүрэгтэй ордыг дэмжихгүй бол хэзээ ч ухуулахгүй гэсэн амлалтдаа Ерөнхий сайд та хүр"

 

Гэрэл зургийг MPA агентлагийн онцгой зөвшөөрөлтэйгөөр ашиглав

"Эрдэс баялгийн салбар дахь алдаа завхрал-Халзан бүрэгтэйн  асуудал” сэдвээр “Халзан бүрэгтэйг хамгаалцгаая” түр хорооноос өнөөдөр Үндэсний мэдээллийн төв хэвлэлийн хурал зохион байгууллаа.

Тус хуралд баруун бүсийн аймгуудын иргэдийн төлөөлөл, Ховд аймгийн Иргэдийн Төлөөлөгчдийн Хурлын төлөөлөгч, судлаач нарын бүрэлдэхүүнтэй хүмүүс оролцсон юм. 

Энэ үеэр уг хэвлэлийн хурлыг зохион байгуулагч, баруун аймгийн иргэдийн төлөөлөл "Сүүлийн үед хэвлэл мэдээлэл болон цахим сүлжээгээр Халан бүрэгтэй ордын талаар худал мэдээлэл явсан. Үүнтэй холбогдуулан бодит мэдээлэл өгөхөөр өнөөдрийн хэвлэлийн хурал зарласан.

Нийтийн эрх ашиг зөрчигдөж байгаа нь тодорхой нотлох баримтуудтай. Ховд болон Увс аймгийн зэргэлдээх сумуудын ард иргэд нийтээрээ эсрэг байр суурийг илэрхийлж, нийтийн эрх ашиг зөрчигдөж байгаа асуудалд тодорхой арга хэмжээ авхуулахаар төрийн байгууллагад бичиг өгсөн. 

Ховд аймгийн болон бүс нутгийн 10 мянган иргэдийн гарын үсгээр баталгаажсан санал хүсэлтийг илэрхийлж, уламжлахаар бид ирсэн.

Газрын ховор элементийн Халзан бүрэгтэй ордыг хөндсөнөөс болж, цацрагт идэвхт туяа их хэмжээгээр дэгдэж, хүрээлэн буй орчинд нөлөөлж эхэлсэн. Үүнийг 2022 онд Үндэсний Аюулгүй Байдлын Зөвлөлөөс томилогдсон ажлын хэсэг ажиллаж уран, цацрагт идэвхт бодисын хэмжээг тогтоон, газрын хөрсөн дээр байх ёстой цацрагт идэвхт бодис байх ёстой хэмжээнээс найм дахин их байгааг тогтоосон. Иймд хүрээлэн буй орчинд аюултай гэсэн. 

"Монголиан Нэшнл Рийр Ийрт Корп" ХХК-ийн явуулж ирсэн үйл ажиллагаа нь хууль нийцэхгүй. Тухайлбал эзэмшиж буй тусгай зөвшөөрөл нь хууль нийцэхгүй байна гэх үүднээс цуцлуулах тухай гомдол төрийн захиргааны төв байгууллагад гарсан.

Мөн байгаль орчныг хамгаалах ажиллагааг хийлгэхгүйгээр үйл ажиллагааг явуулсан. Байгаль орчныг нөхөн сэргээх менежментийн төлөвлөгөөг хуурамчаар батлуулж ирсэн. Энэ мэдээллийг уламжилж өгөх хүсэлтийн үүднээс бид баруун бүсийн иргэдийг төлөөлж энд хүрэлцэн ирсэн" хэмээн ярилаа. 

"Хувийн хэвшил ард иргэд хоорондоо учраа ол гэж битгий түлхээч"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Үргэлжлүүлэн Ховд аймгийн иргэдийн хурлын төлөөлөгч н.Энхбаяр "Энэ зөвхөн Мянгад сумын асуудал биш. Цаашлаад Ховд аймаг, баруун бүс, Монгол орны тусгаар тогтнол эрүүл, аюулгүй орчинд амьдрах, ажиллах эрхтэй холбоотой асуудал юм. 

Татвар буй дор төр байдаг. Төр буй дор татвар бий гэдэг шиг ард иргэд байж улс орон байдаг. Аж үйлдвэр, Эрдэс баялгийн сайд Ж.Туваан аа та мэргэжлийн багтайгаа Ховд аймгийн Мянгад суманд очиж, ард иргэдтэй уулзаж бодит нөхцөл байдалтай танилцана уу. 

Мянгад сумын ард иргэд Халзан бүрэгтэй ордыг дэмжихгүй бол хэзээ ч ухуулахгүй гэсэн амлалтдаа ерөнхий сайд Л.Оюун-Эрдэнэ та хүр, ард түмнийхээ талд бай. Төр захиргааны байгууллагууд ажлаа хийж бодит мэдээллээр ард иргэдээ хангамаар байна. Хувийн хэвшил ард иргэд хоорондоо учраа ол гэж битгий түлхээч" хэмээн ярилаа.