Монголын MLBB тамирчид дахин нэг удаа Дэлхийн тавцанд
“Өөрөөр үз” уриатай “ESN - eSports Network” нь сүүлийн жилүүдэд Монголын И-Спортыг хөгжүүлэхэд том хувь нэмэр оруулж байгаа газар билээ.
Тэд энэ онд олон улсын шууд дамжуулалтуудаас гадна нийт таван тэмцээнийг зохион байгуулснаас дөрвөн тэмцээний гранд финалаа “UG ARENA”-д хийсэн юм. Эдгээр тэмцээнээс хамгийн онцлууштай нь MLBB /Mobile Legend Bang Bang/ тоглоомын хоёр эвент байлаа.
ESN - eSports Network х Moonton Games компанийн хамтын ажиллагааны хүрээнд “MLBB” тоглоом Монгол улсад сүүлийн жилүүдэд маш идэвхтэйгээр хөгжиж, тэмцээн уралдаанууд ч тасралтгүй зохиогдон, олон улсын тэмцээнд Монгол багууд улсаа төлөөлөн оролцож эхэлжээ.
Үүний тод жишээ нь энэ оны анхны “MLBB” тэмцээн болох "MSC 2024 MONGOLIA QUALIFIER" байсан. Тус тэмцээнд нийт 1188 баг бүртгүүлсэн бөгөөд 25,000,000 төгрөгийн шагналын сантайгаар зохион байгуулагдав.
Тэмцээнд түрүүлсэн баг Саудын Арабын Рияад хотноо Esports World Cup /EWC/ нэрийн дор зохион байгуулагдсан Mid Season Cup /MSC/ тэмцээний Wild Card буюу урьдчилсан шатны эрхийг авсан юм. Энэ тэмцээнд “IHC Esports” баг үнэмлэхүй ялалт байгуулж, цааш шалгарсан ч Wild Card шатдаа ялагдал хүлээн тэмцээнээ өндөрлүүлэв.
Үүний дараа ESN - eSports Network-ийн жил бүр зохион байгуулагддаг "ESN National Championship: MLBB" тэмцээн болж, 603 баг бүртгүүлсэн юм. Жил болгоны “Үндэсний аварга”-аар шалгарсан баг нь дэлхийн аварга шалгаруулах тэмцээний “Wild Card” шатны эрхийг авдгаараа онцлог бөгөөд энэ жил “The MongolZ” баг дотоодын тэмцээнд сүүлийн жилүүдэд тасралтгүй түрүүлж байсан “IHC Esports” багийг буулган авч, дэлхийн аваргад өрсөлдөх болсон нь том шуугиан тариад байна.
Ийнхүү тэд энэ сарын 21-нээс 24-ний хооронд Малайз улсад зохион байгуулагдах “M6 Wild Card” тэмцээнд анх удаа оролцоход бэлэн болжээ. Тус тэмцээнд нийт 8 баг “дэлхийн аварга шалгаруулах тэмцээн”-д оролцох цор ганц эрхийн төлөө өрсөлдөх болно. Энэ тэмцээнийг ESN - eSports Network өөрсдийн YouTube, Facebook хуудас болон Premier Sports Network 5 сувгаар албан ёсны эрхтэй шууд дамжуулах юм.
ESN - eSports Network х Moonton Games нь хоёр дахь жилдээ хамтран ажиллаж байгаа бөгөөд тэдний үр нөлөө Монголын “MLBB” төрөл олон улсад гарахад том гүүр болж байгаа юм. Энэ хэрээр дотоодын өрсөлдөөн чангарч, магадгүй дараагийн жилүүдээс манай улсыг төлөөлөн хоёр баг дэлхийн аваргад оролцдог болохыг ч үгүйсгэхгүй юм.
Мөн нэмж хэлэхэд ESN - eSports Network нь Moonton Games-аас гадна Blast, Tencent, Valve, Epulze, зэрэг томоохон тоглоомын компаниудтай хамтарч ажилладаг бөгөөд ирэх жилээс олон улсын болон дотоодын хэд хэдэн тэмцээнийг хамтран зохион байгуулахаар ажиллаж байгаа аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
