ФОТО: Баянзүрх дүүргийн 26 дугаар хороонд орон сууцны шинэ барилга барихыг иргэд эсэргүүцэж байна
Баянзүрх дүүргийн 26 дугаар хороо нь нийслэлийн хамгийн их нягтаршилтай бүсийн нэг.
Гэтэл тус хороонд 16 давхар, хоёр блок орон сууц баригдах гэж байгаа аж. Үүнийг тус хорооны иргэд өнөөдөр эсэргүүцэж буйгаа илэрхийлэв.
Анх тус байршилд 2018 онд Жүдо бөхийн ордон барих гэж байгаад сүүлд орон сууцны барилга барих болж өөрчлөгдсөн, олон эзэн дамжсан гэдгийг Нийслэлийн Иргэдийн Төлөөлөгчдийн Хурал(НИТХ)-ын төлөөлөгч Ч.Батзориг ярилаа.
Тэрбээр "Хотын удирдлагууд өрхийн эмнэлэг, хорооны барилга, сургууль барих талаар хэд хэдэн удаа саналаа илэрхийлсэн. Энэ оны зургаадугаар сард Нийслэлийн Газрын Албанаас энэ газрыг цуцлах мэдэгдлээ компанид нь өгсөн ч Хот төлөвлөлт, стандартын газар нь барилга барих зөвшөөрлийг давхцуулж олгосон.
Компанийн удирдлагуудад бид цэцэрлэг, сургуульгүй энэ бүсэд сургууль барья, үйлчилгээний байгууламж барихад хамтарч ажиллая, олон давхар зогсоол барья, спорт цогцолбор барихад Улаанбаатар хот дэмжлэг үзүүлэхэд харилцан ойлголцъё, зөвшилцье гэж саналаа явуулж байгаа.
Баянзүрх дүүргийн 26 дугаар хороо нь 28,900, түр оршин суугчидтайгаа нийлээд 32,000 хүнтэй. Даац нь хэтэрсэн. Энэ хорооны хүн амын тоо нь гурван аймагтай тэнцэж байгаа тул хариу арга хэмжээ авахгүй бол болохгүй" гэлээ.
Баянзүрх дүүргийн 26 дугаар хороонд оршин суугч "Энэ компанийн удирдлага нь ирдэггүй. Харуул хамгаалалтын ажилтнууд нь хүч нэмэгдүүлээд ажилладаг. Манай хороо улсын цэцэрлэггүй, сургуульгүй. Иймээс сургууль, цэцэрлэг, хүүхдийн сургалтын ордон бариулах хүсэлтэй байна" гэв.
ФОТО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
