ErkaSt дасгалжуулагчийн хувиар анх удаа "Counter Strike-2" тоглоомын ДАШТ-д оролцохоор боллоо

Н.Эрхбаяр, iKon.mn

Өчигдөр 20 цаг 58 минут

iKon.MN

эрэмбэлэх: шинэ нь эхэнд хуучин нь эхэнд

20:51 2024/11/13

Австралийн "FlyQuest" баг "Perfect World Shanghai Major 2024" тэмцээнд оролцох эрхийн төлөө Хятадын "Lynn Vision Gaming"-тай тоглож, 2:0 онооны харьцаатайгаар ялалт байгууллаа. "FlyQuest" баг өрсөлдөгчөө эхний "Nuke map" дээр 13:2, хоёр дахь "Vertigo map" дээр 13:8-аар хожлоо.

Ингэснээр erkaSt буюу Г.Эрдэнэцогт дасгалжуулагчийн хувиар анх удаа Counter Strike-2 (CS2) тоглоомын дэлхийн аварга шалгаруулах тэмцээнд оролцохоор болж байна. Тэрбээр тоглогчийн хувиар хоёр удаа MAJOR буюу дэлхийн аваргад оролцож, sticker гаргаж байсан.

Хятадын Шанхай хотод зохиогдох энэ удаагийн дэлхийн аваргад Ази-Номхон далайн бүсээс Австралийн "FlyQuest", Хятадын "Rare Atom", Монголын "The MongolZ" баг оролцохоор болж байна.

15:31 2024/11/13

Counter Strike-2 (CS2) тоглоомын энэ оны хоёр дахь Дэлхийн Аварга Шалгаруулах Тэмцээн (ДАШТ) буюу "Perfect World Shanghai Major 2024" ирэх сард Хятадын Шанхай хотод зохион байгуулагдана.

1.2 сая ам.долларын шагналын сантай тус тэмцээний урьдчилсан шатны тоглолтууд Шанхай хотод болж байна. Өчигдөр манай улсын "The MongolZ" баг "DRILLAS"-ийг хожиж Ази-Номхон далайн бүсээс дэлхийн аваргад оролцох эрхээ авсан билээ.

Энэ бүсээс дэлхийн аваргад оролцох гурван эрхийн хоёрыг нь Хятадын "Rare Atom" болон "The MongolZ" баг дээд хүснэгтээс авсан. Гурав дахь эрхийн төлөө "DRILLAS", Австралийн "FlyQuest", Хятадын "Lynn Vision Gaming", Хонконгийн "TALON" багууд өрсөлдөж байгаа юм.

Тэгвэл манай улсаас анх удаа дэлхийн аваргад оролцож, "sticker"-ээ гаргасан тоглогч болох erkaSt буюу Г.Эрдэнэцогтын дасгалжуулж буй Австралийн "FlyQuest" баг "DRILLAS"-ийн эсрэг өнөөдөр тоглож, 2:1-ээр ялалт байгууллаа. Австралийн багийн хувьд сүүлийн "Ancient map" дээр гурван удаа нэмэлт үе гаргасны эцэст 22:19-ээр хожив.

Ийнхүү "FlyQuest" баг "DRILLAS"-ийг тэмцээнээс хассанаар Хятадын "Lynn Vision Gaming", Хонконгийн "TALON" багийн аль хожсонтой нь дэлхийн аваргад оролцох эрхийн төлөө 19:00 цагаас тоглохоор болж байна.

ErkaSt дасгалжуулагчийн хувиар гурав дахь удаагаа дэлхийн аваргын сонгон шалгаруулалтад оролцож байгаа юм. Хэрэв "FlyQuest" баг Ази-Номхон далайн бүсээс шалгарч чадвал Г.Эрдэнэцогт дасгалжуулагчийн хувиар анх удаа дэлхийн аваргад оролцоно.

20:51 2024/11/13

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!