Камала Харрис эрүүл мэндийн шинжилгээний тайлангаа нийтэд дэлгэснээр өрсөлдөгч Дональд Трампыг шахалтад оруулав

АНУ-ын дэд ерөнхийлөгч Камала Харрис өчигдөр эрүүл мэндийн үзлэг шинжилгээнийхээ дэлгэрэнгүй тайланг нийтэд дэлгэжээ.

Ингэснээр тэр 2024 оны ерөнхийлөгчийн сонгуульд өөртэй нь өрсөлдөж буй Дональд Трампыг дарамт шахалтад оруулж байна.

Дэд ерөнхийлөгчийн эмч, армийн хурандаа Жошуа Сайммонс өчигдөр 59 настай Харрисын зургаан сарын өмнөх эрүүл мэндийн бүрэн үзлэг шинжилгээний хоёр хуудас дүгнэлтийг нийтэлжээ.

Тэрбээр Харрисыг “гүйцэтгэх засаглалын тэргүүн, төрийн тэргүүн, зэвсэгт хүчний ерөнхий командлагч зэрэг ерөнхийлөгчийн ажил албыг амжилттай хаших хэмжээний бие бялдар, оюун санааны чадамжтай” гэж дүгнэсэн байна.

Жошуа Сайммонс нь АНУ-ын дэд ерөнхийлөгчийн хувийн эмчээр сүүлийн гурван жил, хагас орчим хугацаанд ажилласан хүн юм.

Үүний хариуд Бүгд Найрамдах Намын нэр дэвшигч Дональд Трампын сонгуулийн штаб түүнийг бас ерөнхийлөгчийн албыг хаших шаардлагыг хангасан “төгс эрүүл саруул хүн” гэж тодорхойлоод өмнө нь нийтлэгдэж байсан эрүүл мэндийн үзлэг шинжилгээний тайлангуудын холбоосыг дурджээ.

Гэхдээ Трампын ийм тайлангуудад биеийн жин, цусны даралт, холестеролын түвшин зэрэг дэлгэрэнгүй мэдээлэл огт багтаж байгаагүй юм.

78 настай Трампын хувьд өмнө нь 81 настай ерөнхийлөгч Жо Байдентай өрсөлдөж байхдаа түүний биеийн болон сэтгэцийн эрүүл мэндийн асуудлыг байнга сөхөж, дарамт шахалт үзүүлдэг байсан.

Харин сүүлд Ардчилсан Нам нэр дэвшигчээ Трампаас бараг 20 насаар дүү Харрисаар солиход энэ асуудал эргээд өөрийнх нь сул тал болоод байгаа.

Өчигдөр нийтлэгдсэн тайланд Камала Харрисыг улирлын чанартай харшил, чонон хөрвөсийн өвчний түүхтэйг мэдээлжээ.

Гэхдээ өнгөрсөн гурван жилийн хугацаанд дархлааны эмчилгээ хийлгэснээр харшилд мэдрэмтгий байдал нь эрс сайжирсныг дурдсан байна.

Мөн цусны даралт нь 128/74, зүрхний цохилт минутад 78, цусан дахь хүчилтөрөгчийн хэмжээ 100 хувь гэж мэдээлжээ.

Дэд ерөнхийлөгч бас ойрын хараа бага зэрэг муудсаны улмаас нүдний шил зүүдэг, эхийн талын удамд нь бүдүүн гэдэсний хорт хавдрын түүх байдгийг тайланд дурдсан байна.

Харрисын ээж Шямала Гопалан 2009 оны хоёрдугаар сард 70 настайдаа бүдүүн гэдэсний хорт хавдраар нас барж байжээ.

Тиймээс дэд ерөнхийлөгчид жил бүр хавдрын оношилгоонд орох, тогтмол дархлаажуулалтад хамрагдах зэрэг эрүүл мэндийн урьдчилан сэргийлэх зөвлөмжүүдийг өгсөн байна.

Эдгээрээс гадна Камала Харрисыг “завгүй их ажлын хажуугаар өдөр тутам аэробикийн дасгал, хүчний бэлтгэл байнга хийдэг, эрүүл хоолны дэглэмтэй, тамхи хэрэглэдэггүй, архи согтууруулах ундааг хааяа тохируулж хэрэглэдэг” гэж дүгнэжээ.

Эх сурвалж: Associated Press