АНУ, Их Британийн тэнгисийн хүчнийхэн $209 саяын үнэ бүхий кокаин тээвэрлэсэн шумбагч хөлгийг олзолжээ

АНУ, Их Британийн тусгай хүчнийхэн саяхан Карибын тэнгисээс $209 саяын үнэ хүрэх кокаин тээвэрлэсэн шумбагч хөлгийг олзолжээ.

Британийн тэнгисийн флотын HMS Trent байлдааны хөлөг, АНУ-ын эргийн хамгаалалтын албатай хамтран уг ажиллагааг зохион байгуулсан юм байна.

Хар тамхины гэмт хэрэгтнүүдийн кокаин хил давуулахдаа ашигладаг хөх өнгийн хагас шумбагч хөлгийг Бүгд Найрамдах Доминикан Улсын эргээс өмнө зүгт 190 далайн милийн зайд байхад нь олзолжээ.

 

Энэ нь сүүлийн долоон сарын хугацаанд Trent хөлгийн багийн илрүүлсэн найм дахь хар тамхи нууцаар тээвэрлэх ажиллагаа болсныг Британийн тэнгисийн хүчин мэдээлсэн байна.

Trent хөлөг өнгөрсөн хугацаанд нийтдээ бараг $1 тэрбумын үнэ хүрэх 9 тонн орчим хар тамхийг илрүүлжээ.

Гэхдээ сүүлийн тохиолдолд анх удаагаа шумбагч хөлөг олзолсон юм байна.

Сүүлийн жилүүдэд гэмт хэрэгтнүүд илрүүлэхэд хэцүү, хямд өртөгтэй, автомат жолоодлоготой шумбагч хөлгийг усан хилээр хар тамхи болон бусад хууль бус бодис нэвтрүүлэхэд ашигладаг болжээ. Үүнийг хууль хүчнийхэн "нарко-завь" гэж нэрлэдэг болсон гэнэ.

АНУ-ын зэвсэгт хүчнийхэн ч үүнээс суралцаж, ийм төрлийн хямд өртөгтэй шумбагчийг зэр зэвсэг, хангамжийн материал зөөвөрлөх зэрэг өөр зорилгоор ашиглах боломжийг судалж эхэлсэн байна.

“Үнэнийг хэлэхэд бидний туршиж байгаа шинэ техник бол шууд утгаараа нарко-завь юм. Бид энэ санааг өмнөдийн найзуудаасаа олж авсан” гэж АНУ-ын тэнгисийн хүчний бригадын генерал Саймон Доран энэ сарын эхээр хэвлэлд ярьжээ.

 

АНУ-ын тэнгисийн хүчний `нарко-завь`-наас санаа авч бүтээсэн бага оврын шумбагч хөлөг

Эх сурвалж: Business Insider