Швед улс сайн дураар эх орондоо буцах цагаач бүрийг $34,000 хүртэл мөнгөөр урамшуулдаг болно

Эх орондоо буцахыг зөвшөөрсөн цагаачдад олгодог мөнгөн урамшууллаа $34,000 хүртэл нэмэгдүүлэхээр төлөвлөж байгааг Шведийн засгийн газар өчигдөр зарлажээ.

Олон арван жилийн турш хүнлэг ёсны үлгэр жишээ болж ирсэн Скандинавын хойгийн тус улс сүүлийн жилүүдэд гадаадын цагаачдыг өөрийн нийгэм, соёлд уусган идээшүүлэхэд олон асуудал бэрхшээлтэй тулгарч байгаа.

Одоо Шведийн засгийн газар сайн дураар эх орондоо буцах насанд хүрсэн цагаач тус бүрд 10,000 крон ($971), хүүхэд бүрд 5,000 крон, гэр бүл бүрд 40,000 крон хүртэл мөнгө төлдөг.

Тэгвэл 2026 оноос эхлэн энэ тааз 350,000 крон ($34,000) болж эрс нэмэгдэхийг Шведийн засгийн газар өчигдөр мэдээлжээ.

“Бид цагаачлалын бодлогоо үндсээр нь өөрчлөх гэж байна” гэж Цагаачлалын асуудал эрхэлсэн сайд Йохан Форселл өчигдөр сэтгүүлчидтэй уулзахдаа хэлсэн юм.

“Буцах цагаачийн тэтгэлэг 1984 оноос хойш хэрэгжиж байгаа ч хүмүүсийн ихэнх нь мэддэггүй, хэмжээ нь бага, харьцангуй цөөн хүн ашиглаж иржээ” гэж засгийн газрыг бүрдүүлэгч эвслийн гол төлөөлөгч Ардчилсан намын тэргүүн Людвиг Асплинг энэ үеэр тайлбарласан байна.

Тухайлбал дээрх боломжийг өнгөрсөн онд ганцхан хүн ашигласныг Форселл сайд дурджээ.

Шинэчилсэн тэтгэлгийг олон хүн мэддэг болж, мөнгөний хэмжээ нэмэгдэхээр сайн дураар буцах цагаачдын тоо нэмэгдэнэ гэж тэд тооцоолж байгаа юм байна.

Шведэд тогтмол эрхлэх ажил хөдөлмөр олж чадахгүй байгаа, хэрэгцээгээ хангах орлого олж чадахгүй байгаа хэдэн зуун мянган цагаач үүнд хамрагдах боломжтой гэж үзэж байгаа гэнэ.

“Цагаачдын энэ хэсгийн сонирхлыг татна гэж бид бодож байна” гэж Асплинг тайлбарлажээ.

Европын бусад улсууд бас сүүлийн үед сайн дураараа буцах цагаачдад олгодог тэтгэмжийн мөнгөний хэмжээгээ нэмэгдүүлж эхлээд байгаа.

Тухайлбал Дани улс цагаач бүрд $15,000 олгодог болсон нь Норвегийн $1,400, Францын $2,800, Германы $2,000-тай харьцуулахад олон дахин өндөр дүн юм.

Ерөнхий сайд Улф Кристерссоны эвслийн засгийн газар 2022 онд байгуулагдахдаа цагаачлал, гэмт хэрэгтэй хатуу тэмцэхээ амлаж байлаа.

Парламентад цөөнх болдог намуудаас бүрдсэн тус эвслийг барууны үзэл баримтлалтай Ардчилсан Нам тэргүүлдэг.

Шведийн Ардчилсан Нам 2022 оны сонгуулиар 20.5 хувийн санал авч, парламентын хоёр дахь том нам болсон юм.

Швед улс 1990-ээд оноос гадаадын цагаачдыг их хэмжээгээр авч эхэлсэн. Тус улсад ихэвчлэн хуучин Югослав, Сири, Афганистан, Сомали, Иран, Ирак зэрэг улсаас цагаачид ирдэг.

Европын цагаачлалын хямрал туйлдаа хүрсэн 2015 онд Шведэд 160,000 цагаач ирсэн нь хүн амын тоотой харьцуулахад Европын Холбоонд тэргүүлэх үзүүлэлт байжээ.

Эх сурвалж: AFP