Амазоны ширэнгэд гадаад ертөнцөөс тусгаарлагдан амьдардаг хүмүүсийн гэрэл зургийг буулгажээ

Перу улсын алс бөглүү нутаг, Амазоны ширэнгийн нэг хэсэгт гадаад ертөнцөөс тусгаарлагдан амьдардаг овог аймгийн хүмүүсийн ховор гэрэл зургийг Survival International байгууллага Мягмар гарагт нийтэд үзүүлжээ.

Нутгийн хүмүүсийн Машко Пиро гэж нэрлэдэг энэ овгийнхон ширэнгээсээ огт гарч ирдэггүй, гадаад ертөнцтэй харьцдаггүй юм байна.

Гэвч сүүлийн үед хоол хүнс нь ховордож, мод бэлтгэх үйл ажиллагаа эрчимжсэний улмаас ширэнгээсээ ойр ойрхон гарах болжээ.

Дээрх гэрэл зургийг зургаадугаар сарын сүүлээр Бразил улстай хил залгаа зүүн өмнөд Перугийн нэг голын эргээс буулгасан юм байна.

 

“Мод бэлтгэгчид үйл ажиллагаагаа эхлүүлэхээр бэлдэж буй газраас хэдхэн километрийн зайд Машко Пиро овгийнхон гадаад ертөнцөөс тусгаарлагдан амьдарч буйг энэхүү гайхалтай гэрэл зураг харуулж байна” гэж Survival International байгууллагын захирал Каролин Пирс мэдэгджээ.

Тэдний амьдарч байгаа ширэнгэ рүү мод бэлтгэх зорилгоор Canales Tahuamanu нэртэй компани саяхан 200 км зам тавьсан юм байна.

Тус компани Перугийн засгийн газраас 53,000 гектар талбайд мод бэлтгэх зөвшөөрөл авчээ.

Уг талбай нь Машко Пиро овгийнхон амьдардаг Мадре де Диос нэртэй ширэнгийн бүсэд багтдаг юм байна.

“Тэд мод бэлтгэгчдээс зугтан Перугийн талд очсон байна. Жилийн энэ үед тэд Амазоны яст мэлхийн өндөг түүхээр голын эрэгт гарч ирдэг. Гэтэл энэ хүмүүс ойр ойрхон ширэнгээсээ гарах болсон нь тэд үргэлж зугтаж, тайван амьдрах аргагүй болсныг харуулж байна” гэж Бразилын Католик сүм хийдийн уугуул иргэдийн зөвлөлийн төлөөлөгч Роса Падиля ярьжээ.

Эх сурвалж: CNN