Хяналтгүй крипто олборлолт Оросын эрчим хүчний системийг унагах эрсдэлтэйг Путин анхааруулав

Криптовалютын хууль бус олборлолт Оросын эрчим хүчний системийн ачааллыг нэмэгдүүлж, өргөн хүрээний тасалдал үүсгэж болзошгүй байгааг ОХУ-ын ерөнхийлөгч Путин өчигдөр анхааруулжээ.

Тэрбээр өчигдөр эдийн засгийн асуудлаар холбогдох албаныхантай уулзахдаа “Криптовалют олборлох үйл ажиллагааны хяналтгүй өсөн нэмэгдэлт манай зарим бүс нутагт эрчим хүчний тасалдал үүсгэж болзошгүй болжээ” гэж хэлсэн байна.

ОХУ-ын эрчим хүчний яам энэ үеэр крипто олборлолтын жилийн дундаж хэрэглээ 16 тэрбум киловатт/цаг байгаа нь тус улсын нийт хэрэглээний 1.5 хувь орчим болж буйг мэдээлжээ.

Хэдийгээр криптовалютын орчны хатуу хяналт зохицуулалттай ч Орос улс 2023 онд АНУ-ын дараа хоёр дахь том олборлогч улс болж байв.

Өмнө нь Хятад, Казахстан улсууд энэ салбарт тэргүүлдэг байсан ч хатуу арга хэмжээний үр дүнд багасгаж чадсан юм.

Саяхан Ар Кавказын Бүгд Найрамдах Дагестан Улсад урт хугацаанд үргэлжилсэн эрчим хүчний тасалдал гарсан.

Тус бүс нутаг Оросын криптовалют олборлолтын “нийслэл” хэмээн өргөмжлөгддөг юм.

Хуучирч муудсан эрчим хүчний дэд бүтэц нь уг үйл ажиллагааны ачааллыг даахгүй болсноос томоохон тасалдал үүссэн гэж мэргэжилтнүүд үзэж байгаа.

Путин өчигдөр крипто олборлогчдын үйл ажиллагааг татвараар зохицуулах, үүнийг шийдвэрлэх холбооны хэмжээний хууль боловсруулж мөрдөх чиглэлийг албаныханд өгсөн байна.

2020 онд Путин криптовалютыг санхүүгийн дижитал хөрөнгө хэлбэрээр ашиглахыг зөвшөөрсөн хууль баталж байв. Гэхдээ бараа бүтээгдэхүүн, үйлчилгээний төлбөрийн хэрэгсэл болгохыг хориглосон юм.

Тус улс 2023 онд блокчэйн технологид суурилсан “Дижитал Рубль” төлбөр тооцооны хэрэгсэл бий болгох ажлыг эхлүүлж байв.

Эх сурвалж: The Moscow Times