TV9 Э.Батшугар, Mongol TV Л.Оюун-Эрдэнэ, Ч.Номин, МҮОНТ А.Отгонбаатар нэр дэвшигчийг хамгийн их сурталчилжээ
УИХ-ын 2024 оны сонгуулийн үр дүн, мониторингийн талаар “Бодлогод залуусын хяналт” ТББ-аас танилцууллаа.
Энэ үеэр нэр бүхий таван телевизийг хэвлэл мэдээллийн байгууллагын төлөөлөл болгож, сонгуулийн үеэрх мэдээлэлд нь дүн шинжилгээ хийснийг “Глоб Интернэшнл төв” ТББ-аас мэдээлэв.
Тодруулбал
- Монголын Үндэсний Олон Нийтийн Телевиз (МҮОНТ)
- TV9
- Mongol TV
- NTV
- Eagle телевизийн сонгуулийн холбогдолтой мэдээллийн хувийг тус тус тодорхойлсон байна.
Сонгуулийн сурталчилгааны албан ёсны хугацаа буюу зургаадугаар сарын 10-26-нд хийсэн мониторингийн дүнг “Глоб Интернэшнл төв” ТББ-ын гүйцэтгэх захирал Б.Онон дараах байдлаар танилцуулсныг хүргэе.
Сурталчилгаа нь телевизээр хамгийн их гарсан нэр дэвшигчид:
Энэ талаар "МҮОНТ-ийн хувьд эфирийн хамгийн их сурталчилгааны цагийг Үнэн Ба Зөв Намын нэр дэвшигч А.Отгонбаатарт зарцуулсан байна. Тухайн нэр дэвшигч мэтгэлцээнд хэд хэдэн удаа орсон нь сонгуулийн дүнд ингэж нөлөөлжээ.
Харин
- TV9 телевизийн хувьд Э.Батшугар
- Mongol TV телевизээр Л.Оюун-Эрдэнэ, Ч.Номин
- Eagle телевизийн хувьд Н.Номтойбаяр
- NTV телевизээр Л.Гантөмөр гишүүний сурталчилгаа хамгийн их гарсан" гэдгийг хэллээ.
Хүснэгт 1: Сонгуулийн сурталчилгаа нь хамгийн их гарсан нэр дэвшигчид (Телевиз)
| МҮОНТ | TV9 | Mongol TV | NTV | Eagle News | |
|---|---|---|---|---|---|
| 1 | А.Отгонбаатар (ҮБЗН) | Э.Батшугар (МАН) | Л.Оюун-Эрдэнэ (МАН) | Л.Гантөмөр (АН) | Н.Номтойбаяр (ҮЭ) |
| 2 | Т.Доржханд (ХҮН) | С.Бямбацогт (МАН) | Ч.Номин (МАН) | Л.Оюун-Эрдэнэ (МАН) | Л.Оюун-Эрдэнэ (МАН) |
| 3 | Х.Бат-Ялалт (МХТН) | Г.Болормаа (АН) | Д.Амарбаясгалан (МАН) | Ч.Лодойсамбуу (АН) | Л.Гантөмөр (АН) |
| 4 | Л.Гүндалай (АТХН) | Л.Оюун-Эрдэнэ (МАН) | Д.Ганмаа (МАН) | Т.Мөнхсайхан (МАН) | Д.Амарбаясгалан (МАН) |
| 5 | Л.Оюун-Эрдэнэ (МАН) | Н.Номтойбаяр (ҮЭ) | Б.Солонгоо (МАН) | Ж.Энхбаяр (МАН) | Ч.Лодойсамбуу (АН) |
"Арилжааны телевизүүд 2-3 намыг түлхүү сурталчлаад бусад намд маш бага цаг оноожээ"
“Глоб Интернэшнл төв” ТББ-ын гүйцэтгэх захирал Б.Онон "Сонгуулийн үеэр зарим арилжааны телевиз нам, эвсэлд эфирийн цагийг хэрхэн зарцуулсан бэ гэдэгт мониторинг хийлээ.
Эндээс харахад TV9 телевизийн сонгуультай холбоотой нийт мэдээллийн 52 хувь нь МАН, Монгол TV телевизийн 88 хувь нь МАН-д тус тус зарцуулагдсан байна.
Мөн Eagle телевизийн 35 хувь нь МАН-д зарцуулагдсан нь бусдаасаа өндөр байгаа юм. Харин NTV телевизийн сонгуультай холбоотой нийт мэдээллийн 48 хувийг АН эзэлж байна.
Арилжааны телевизүүд 2-3 намыг түлхүү сурталчлаад бусад намуудад цагийг маш бага оноожээ" гэв.
"МҮОНТ-ийн мэдээний хөтөлбөрт МАН 57 хувийг эзэлж байсан"
Мөн "МҮОНТ-ийн сонгуультай холбоотой мэдээлэл мэдээний хөтөлбөрт эзлэх хувийг танилцуулъя. Тус телевизээр
- МАН 57 хувь
- АН 18 хувь
- ХҮН нам есөн хувьтай мэдээний хөтөлбөрөөр гарчээ.
Мэдээний хөтөлбөр төлбөр төлдөггүй учраас бүх нам, эвслийг жигд оруулж мэдээлэх боломжтой. Гэтэл дээрх телевизүүдийн тэнцвэртэй мэдээлж буй үзүүлэлт маш муу.
Сонгуулийн сурталчилгааны үеийн мэдээллийн агуулгыг ангилж үзэхэд нэр дэвшигчдийн мөрийн хөтөлбөр өндөр хувийг эзэлсэн" гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
