У.Отгонбаяр: Надад амьдралын туршлага байгаа
Монгол Ардын Намын Бага хурал үргэлжилж байна. Хурлаас 2024 оны УИХ-ын сонгуульд нэр дэвшигчдээ тодруулах юм.
МАН-ын Бага хурлын гишүүн, Монгол Улсын Ерөнхийлөгч У.Хүрэлсүхийн төрсөн дүү У.Отгонбаяр сэтгүүлчдийн асуултад хариуллаа. Тэрбээр УИХ-ын 6-р тойрог буюу Хэнтий, Дорнод, Сүхбаатар аймагт нэр дэвшихээр горилж байгаа юм.
-Та Бага хурлаас мандат авч чадна гэдэгтээ итгэлтэй байна уу. Хурлын шийдвэрийг хүлээн зөвшөөрөх үү?
-Хүлээн зөвшөөрнө. Итгэл үнэмшил байгаа учраа нэр дэвших хүсэлтээ илэрхийлсэн.
-Танд улс төрийн ямар туршлага байгаа вэ?
-Амьдралын туршлага байна. Бас залуу насанд хийж бүтээсэн, төрд ажилласан туршлага бий.
-Жирийн иргэдийн боломжийг хулгайлж, зээлээр суралцсан хүн нэр дэвших эрхтэй гэж та бодож байна уу?
-Би зээлээ буцааж төлсөн. Зээлээ тэглүүлээгүй. Мөнгөө төлсөн.
-Ерөнхийлөгчийн дүү гэдэг нь танд давуу тал болж байна уу?
-Нэг их давуу тал болоод байгаа юм байхгүй. Би Ухнаагийн Отгонбаяр гэдэг хувь хүн.
-Та ямар бизнес эрхэлдэг вэ?
-Нийтийн хоолны бизнес эрхэлдэг.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
