Хамгийн олон буюу 10 мандаттай тойргийн саналын хуудас 78.7 см хүртэл урттай байна
СЕХ-ноос 2024 оны УИХ-ын сонгуулийн бэлтгэл ажлын талаар болон цаг үеийн асуудлаар мэдээлэл хийлээ.
СЕХ-ны нарийн бичгийн дарга Д.Даваа-Очир “Өнөөдрийн байдлаар 23 нам, хоёр эвслийг СЕХ бүртгээд байна. Аймаг, нийслэл болон 330 суманд сонгуулийн хороо байгуулсан. Одоо 2,691 хэсэг байгуулахаар бэлтгэл ажил хангаад явж байна. Тавдугаар сарын 14 гэхэд бүх хэсэг байгуулагдсан байна.
СЕХ-ноос өчигдөр сонгуулийн саналын хуудасны загварыг баталлаа. Ирэх долоо хоногоос нэр дэвшигчид тодорхой болно. Өчигдрийн байдлаар 77 бие даагч тодорхой болоод байна. Нэр дэвшигчид тавдугаар сарын 14-21-ний хооронд тодорсноор сонгуулийн бэлтгэл ажлын гол ажлууд бэлэн болно" гэв.
СЕХ-ны Хууль, эрх зүйн хэлтсийн дарга Д.Бат-Эрдэнэ "СЕХ-ны хуралдаанаар саналын хуудасны загварыг батлаад байна. Энэ удаагийн УИХ-ын сонгуулиар иргэд анх удаа мажоритар, пропорционал хоёр тогтолцоогоор 126 гишүүн сонгох гэж байгаа нь хамгийн чухал өөрчлөлт. Тиймээс саналын хуудсыг сонгогчдод ойлгомжтой байх талаас нь нэлээд анхаарсан. Энэ хүрээнд сонгуульд оролцож бүх талаас нээлттэй санал авсан.
Ингээд саналын хуудас нь хуульд зааснаар хоёр хэсэгтэй байна. Өөрөөр хэлбэл, 48 гишүүнийг сонгох пропорционал системээр сонгох хэсэг, нөгөө нь 78 гишүүнийг сонгох мажоритар тогтолцооны хэсэг гэсэн хоёр хэсгээс бүрдэнэ. Энэ бүх мэдээллийг иргэдэд хүргэхийн тулд СЕХ-ноос хэвлэлийн хурал хийгээд байхаас илүү гудамжинд гарч, сонгогчдод хүрч ажиллана. Жишээ нь, бид номын баярт оролцож, сонгогчийн боловсрол олгох, саналын хуудас ямар байх талаар мэдээлэл түгээнэ.
Саналын хуудаст намуудыг нэрсийн дараалал, нэр дэвшигчийн нэр ямар дарааллаар, яаж бичигдэх вэ гэдгийг хуульд тодорхой заасан байдаг. Саналын хуудсыг энэ дагуу баталсан. Саналын хуудас тусгай нууцлалтай, үнэт цаас. Нам, эвслүүдийн нэр Улсын Дээд Шүүхэд бүртгүүлсэн дарааллаараа бичигдэнэ. Намаас нэр дэвшиж байгаа хүмүүсийн хувьд тухайн нам нь нэрсийн дарааллаа СЕХ-нд ирүүлдэг. Жишээ нь, 10 мандаттай тойрогт нэр дэвшигчдийн хэнийх нь нэр хамгийн эхэнд байх вэ гэдгийг тухайн нам шийддэг" гэлээ.
СЕХ-ноос баталсан УИХ-ын сонгуулийн саналын хуудасны загвар
