Украинд үзүүлэх тусламжийн мөнгө дуусаж байгааг Цагаан ордон анхаарууллаа

Украинд үзүүлэх тусламжийн асуудал АНУ-ын Конгресс дээр маргаантай байгаа. Гол хоёр намын хууль тогтоогчид уг тусламжийг цаашид үргэлжлүүлэх эсэх, үргэлжлүүлэх бол хэрхэн үргэлжлүүлэх асуудлаар санал хуваагдаж, тусламжийн мөнгийг ирэх оны төсөвт тусгах асуудал гацаад байна.

Даваа гарагт Цагаан ордны төсөв хариуцсан захирал Шаланда Юнг энэ асуудлаар Бүгд Найрамдах, Ардчилсан намын удирдагчдад нээлттэй захидал илгээжээ.

Тэрбээр захидалдаа энэ оныг дуусахаас өмнө Украинд үзүүлэх зэр зэвсгийн тусламжийн хөрөнгө мөнгийг батлахгүй бол тус улсын ард түмэн Оросын эзлэн түрэмгийлэгчдийн өмнө “өвдөг сөхрөх” эрсдэлтэйг анхааруулсан байна.

Өчигдөр Конгрессын төлөөлөгчдийн танхимын спикер, Бүгд Найрамдах намын хууль тогтоогч Майк Жонсон “Украинд тодорхой стратеги, мөргөлдөөнийг шийдвэрлэх арга зам, Америкийн татвар төлөгчдийн үзүүлж буй тусламжийн хариуцлагыг зохих ёсоор баталгаажуулах төлөвлөгөө Байдены засаг захиргаанд байхгүй байна гэсэн миний шүүмжлэлд бодитой хариу өгөөгүй” гэж сошиал хуудсандаа бичжээ.

2022 оны хоёрдугаар сард дайн эхэлснээс хойш АНУ-ын Конгресс Украины засгийн газарт зориулан нийт $110 гаруй тэрбумын зэр зэвсэг, санхүүгийн тусламж баталсан.

Байден өмнө батлагдсан тусламжийн төсөв шавхагдах дөхөж буйг сүүлийн хэдэн сарын турш анхааруулж байгаа.

Санхүүжилтийн саатал хэдийнээ Украины дайны нөхцөл байдалд нөлөөлөөд эхэлсэн гэж судлаачид үзэж байна.

Тухайлбал эзлэгдсэн нутаг дэвсгэрээ Оросын цэргээс чөлөөлөх Украины армийн сөрөг давшилт удаашрахад сум хэрэгслийн дутагдал нөлөөлж байгаа юм.

“Украинчуудад хэцүү сонголт тулгараад байна. Хэрвээ тэд АНУ-аас ямар нэг тусламж авах найдвар тасарвал одоо байгаа нөөцөө гамнах хэрэгтэй болно” гэж Америкийн Энтерпрайз Хүрээлэнгийн “Critical Threats Project” төслийн захирал Фредерик Каган тайлбарлажээ.

Байдены засаг захиргаа Украинд үзүүлэх тусламжийн $61.4 тэрбумын багцыг баталж өгөхийг Конгрессоос хүсээд байгаа. Одоо Конгресс дахь хоёр намын дотор Украины тусламжийг батлуулах зорилготой бүлэглэлүүд идэвхтэй ажиллаж байна. Тэд дээрх дүнгээр биш юмаа гэхэд тодорхой хэмжээний төсөв батлуулах боломжтой юм.

Конгрессын дээд танхим Сенатад одоо бас зөвхөн Украинаас гадна Тайвань, Израилийн тусламж, АНУ-Мексикийн хилийн хамгаалалтыг чангатгах арга хэмжээг нийлүүлсэн $106 тэрбумын төсөв хэлэлцэгдэж байгаа.

Уг төсөв батлагдахад саад болж буй бас нэг асуудал нь АНУ-Мексикийн хилийн хамгаалалтыг тойрсон цагаачлалын бодлогын асуудал юм.

Хоёр намын төлөөлөгчид цагаачлалын бодлого дээр нэлээд зөрчилтэй байр суурьтай байдаг.

Төсөв батлахад бас сонгуулийн жил гарах гэж байгаа нь Конгрессын гишүүдэд нөлөөлж байна. Үүнийг мэдэрсэн Цагаан ордон өчигдрийн захидалдаа Украинд үзүүлэх тусламжийн мөнгө АНУ-ын эдийн засагт ямар нөлөө үзүүлэхийг бас тайлбарлажээ.

“Бид Алабамад үйлдвэрлэсэн Javelin зэрэг пуужингууд, Виржиниа, Арканзас, Техаст үйлдвэрлэсэн олон пуужин харвах систем, Пенсилвань, Арканзас, Айова болон бусад мужуудад үйлдвэрлэсэн их бууны сум зэрэг чухал зэвсэг, техник хэрэгслээ энэ тусламжийн багцаар шинэчлэх боломжтой юм” гэж дээрх захидалд бичсэн байна.

Эх сурвалж: BBC