СЭРЭМЖЛҮҮЛЭГ: Суудлын хоёр машин мөргөлдөж, шатсаны улмаас таван иргэн амиа алджээ
Суудлын хоёр машин мөргөлдөж, гурван хүн амиа алдсан осол орон нутагт гарчээ.
ОБЕГ-аас мэдээлснээр өчигдөр 22:42 цагт Баян-Өлгий аймгаас Ховд аймгийн чиглэлд зорчиж явсан хоёр зорчигчтой Приус-20 загварын автомашин, Ховд аймгаас Баян-Өлгий аймгийн чиглэлд зорчиж явсан таван зорчигчтой Приус-20 загварын суудлын автомашин мөргөлдөж, нэг машин нь шатсан байна.
Ослын улмаас автомашины бүхээгт 51-61 насны гурван иргэн хавчуулагдан шатаж нас барсан харамсалтай осол гарчээ.
Үлдсэн дөрвөн иргэнийг аймгийн Нэгдсэн эмнэлгийн Яаралтай тусламжийн тасагт хүргэсэн байна.
Иймд иргэд замын хөдөлгөөнд оролцохдоо гарч болзошгүй эрсдэлээс урьдчилан сэргийлж, замын хөдөлгөөний дүрмийг мөрдлөг болгон өөрийн болон бусдын аюулгүй байдлыг хангаж хөдөлгөөнд оролцохыг Тээврийн цагдаагийн албанаас анхааруулав.
ЦЕГ-ын ХМТ-өөс "Цагдаагийн байгууллагад 2023 оны есдүгээр сарын 10-ны өдрийн 21:23 цагт Ховд аймгийн Ховд сум, Улаанбураа багийн нутаг дэвсгэрт “Автомашинууд мөргөлдөж, нэг машин нь шатаж байна” гэх дуудлага, мэдээлэл бүртгэгдсэн.
Тус аймгийн цагдаагийн газраас шалгалтын ажиллагаа явуулахад “Toyota” маркийн “Prius” загварын 2 тээврийн хэрэгсэл мөргөлдөж, ослын улмаас 2 тээврийн хэрэгслийн жолооч, зорчиж явсан 3, нийт 5 хүн амь насаа алдаж, 2 зорчигч гэмтсэн байна. Амь насаа алдсан иргэдийн 3 нь ослын газар дээр, 2 нь эмнэлгийн тусламж авсан хэдий ч гэмтлийн улмаас амь насаа алджээ.
Урьдчилсан байдлаар жолооч “С” нь замын урсгал сөрж хөдөлгөөнд оролцсоны улмаас эсрэг урсгалд зорчиж явсан “Toyota” маркийн “Prius” загварын тээврийн хэрэгслийг мөргөж, шатсан нөхцөл байдал тогтоогдоод байна" хэмээн мэдээллээ.
Иймд иргэд, жолооч нарт дараах сэрэмжлүүлгийг хүргэж байна.
- Үзэгдэх орчин хязгаарлагдмал замд гүйцэж түрүүлэх үйлдэл хийхгүй байх, амжих байх гэсэн эрсдэлтэй үйлдлээс осол гардаг
- Замын нөхцөл байдалд хурдаа тохируулж хөдөлгөөнд оролцох
- Холын замд гарахдаа тээврийн хэрэгслийн бүрэн бүтэн байдлыг сайтар хангах, тэнхлэг тохиргоо хийлгэх болон явах эд ангид эвдрэл, гэмтэл үүссэн эсэхийг сайтар шалгах
- Хэт ядарсан үед болон архи, согтууруулах ундаа хэрэглэсэн үед жолоо барихгүй байх
- Жолоодох эрхийн үнэмлэхгүй болон насанд хүрээгүй хүнд жолоо шилжүүлэхгүй байх
- Аюулгүйн бүс нь зөвхөн жолоочид биш тухайн тээврийн хэрэгсэлд сууж буй хүн бүр зүүх
- Гэрэл шилжүүлэх нь өөдөөс ирж буй тээврийн хэрэгсэл, иргэдийн амь нас, аюулгүй байдал, эрүүл мэндийг хамгаалах үйлдэл гэдгийг анхаарч зам тээврийн ослоос урьдчилан сэргийлээрэй.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
24 СЭТГЭГДЭЛТЭЙ
|
