Гэрэл зургийг MPA агентлагийн онцгой зөвшөөрөлтэйгөөр ашиглав

Жина Чавез өөрийгөө Техас хүн, Католик шашинтан, Күийр хэмээн тодорхойлжээ.

Англи болон Испани хэлээр дуулж, латин поп урсгалаар уран бүтээлээ туурвин, өөрийн түүхээ бусдад хуваалцдаг тэрбээр хамтлагтайгаа манай улсад ирээд байна. 

Тэднийг эхний тоглолтоо хийхээр бэлдэж байх үеэр нь цөөн хором ярилцлаа.

- Та бүхний бэлтгэл үргэлжилж байна вэ. Тоглолтдоо уран бүтээлчидтэй хамтарч байна уу?

Жина: -Бид тоглолтдоо бэлэн болсон. Лана болон Соботой хамтдаа бэлтгэлээ хийж байгаа. Эрч хүчтэйгээр тоглолтдоо бэлдэж, сэтгэл их хөдөлж байна. 

Өөрсдийн дуунаас гадна монгол уран бүтээлчдийн дуунаас дуулахаар бэлтгэлээ хийж байна. Би АНУ-ын хотуудаар болон өөр улсуудаар ч Элчин сайдыг яамдын урилгаар тоглолтоо хийж байв. 

Харин энэ удаагийн их онцлог. Учир нь миний хувьд “Бахархлын өдрүүд”-ийг тэмдэглэх хүрээнд уригдан ирж буй анхны тохиолдол маань.

- Монгол дуу дуулна гэлээ. Ямар дуунууд байх вэ?

- Монгол дууг дуулж байгаадаа тун баяртай байгаа. Өөр улсын хэлээр дуулж сурах гэж байгаадаа баяртай байна. "Толин хул" дуу анх сонсоход сэтгэл их хөдөлсөн. Мөн Укагийн "Мөрөөдөл бид хоёр" дууг Лана, Соёмбоотой хамт дуулах юм.

- Та бүхэн анх удаа Монголд ирж байгаа байх. Улаанбаатар хоттой танилцаж амжсан уу?

Жина: Тийм ээ. Бид бүгд анх удаа ирцгээж байна. Улаанбаатар сайхан хот байна. Бид өнөөдөр ууланд алхаж үзлээ. Байгаль ямар үзэсгэлэнтэй байсан гэж санана. Багахан ядарсан (инээв)

Даниэл: Бидний амьдардаг түвшнээс хамаагүй өндөр санагдсан. Хэдэн зуун фийт өндөр байсан байх аа.

Кэй: 1,600 фийтээр илүү өндөр байсан. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

- Та нар хэдэн хүний бүрэлдэхүүнтэй ирсэн бэ?

Жина: -Таван хүний бүрэлдэхүүнтэй ирсэн. Гитарчин Элай, бөмбөрчин Жош мөн Даниэл, Кэй болон би.

- Танай хамтлаг байгуулагдсан түүхээс хуваалцана уу. Хэрхэн танилцацгааж байсан бэ?

Жина: -Нэг сонирхолтой зүйл хэлэхэд бид нар энэ бүрэлдэхүүнээрээ анх удаа тоглох гэж байна. Жошоос бусад гишүүн маань энэ оны эхээр Коста Рика болон Гондураст аялан тоглож байв. Харин Жош бидэнтэй хамт анх удаа тоглох байна. 

Элай, Даниэл бид гурав Техасын Аустинд амьдарцгаадаг. Кэй бид хоёр дуучид, хөгжимчдийн гишүүнчлэлтэй  ашгийн бус байгууллагад байхдаа танилцсан.

- Жина, таны тухай уншиж байхад нэг сонирхол татсан зүйл нь коллежид орох хүртэл гитартай байгаагүй тухай байв. Урлагийн хүмүүс ихэвчлэн багаасаа л хөгжимтэй тун ойр байсан байдаг шүү дээ. Та дуу хөгжимтэй холбогдсон түүхээсээ хуваалцана уу?

Жина: -Би хүүхэд байхаасаа дуулах дуртай байлаа. Коллежид орохдоо үедээ анхны гитараа авсан. Маш хурдан тоглож сурсан. Анхлан сүмийн дуунууд сурсан л даа. Ер нь миний урлаг дахь аяллын минь нэлээд хэсэг нь сүмтэй холбоотой. Мөн сүмд эхнэртэйгээ танилцаж байлаа. Тэгэхээр бүх л түүх минь сүмээс эхэлдэг гэж хэлж болно.

Би хөгжмөөр дамжуулан өөрийн түүхийг хүүрнэдэг. Күийр, католик, Мексик гаралтай ч испани хэл мэддэггүй байсан гэх мэтээр өөрийнхөө талаар би бусдад хуваалцдаг юм. 

Хөгжим надад түүхээ хуваалцах боломжийг олгодог. Мөн аялан тоглолт бол бүхэлдээ бусадтай танилцах, ярилцах зэргээр холбоо тогтоох том боломж. Биднийг сонссон хүмүүс хүн бүрийн түүх чухал гэдгийг ойлгоосой гэж хүсдэг. 

- Та яагаад Латин поп хөгжмийн сонгох болсон бэ. Энэ нь таны дотоод сэтгэл хөдлөлийг хамгийн тод илэрхийлж чадна гэж боддог уу?

Жина: - Сайхан асуулт байна. Би испани хэл мэддэггүй байлаа. Хөгжим миний испани хэл сурах, Латин Америк соёлд суралцах үүд болсон. 

Яагаад гэж тодорхойлж хэлж мэдэхгүй юм, би зүгээр л латин поп хөгжимд хайртай. 

Би испаниар дуулж байхдаа өөрийнхөө өөр нэгэн талыг мэдэрдэг. Өөр хэл сурч, түүгээр дуулж байгаа нь англиар дуулахаас илүү өөр талыг минь надад мэдрүүлдэг. Тиймээс л би үүнд их дуртай байх. Мөн өөр төрлийн дуунуудыг шинэчлэн дуулдаг. 

- Монгол бол соёлын элчийнхээ хувиар ирж буй 11 дэх улс тань байх, тийм үү. Ямар санагдаж байна вэ?

Жина: - Би хаана ч очсон байлаа шинэ хүмүүстэй танилцахдаа хамгийн их дуртай. Олон шинэ танилтай болно гэдэг тун сайхан. 

Монголд ирээд ЛГБТ төвийнхөн, Күийр хүмүүстэй уулзсан. Эдгээр хүнийг тухайн нийгэм нь ойлгож байна гэдэг тун сайн хэрэг. Хэдий тийм ч гэлээ нийгмийн дунд орж амьдрахад хүндрэл гардаг гэдгийг ойлгож байна. Бид бүгд л ижил зүйлийг мэдэрдэг. АНУ-д ч гэлээ, миний амьдардаг Техас мужид Засаг захиргаанаас биднийг эрхийг хамгаалахаар ихээхэн хичээдэг ч Күийр, транс хүмүүст асуудал тулгарсан хэвээр л байдаг. 

Нийгэм тэр аяараа чамайг эсэргүүцэж байхад чи яаж зүрх сэтгэлээ дагах вэ. Тэд чамайг ялгаварлан гадуурхах болно шүү дээ. Хуулийн дагуу өөрийнхөө эрхийг эдэлж чадахгүй байна гэсэн үг, энэ үнэхээр хэцүү. 

- Тиймээс та энэ бүхнийг хөгжмөөрөө дамжуулан илэрхийлдэг байх. Хөгжим бол дэлхий нийтээрээ ойлгодог ганц хэл гэхэд болно. Та бүхэн хөгжмийг юу гэж тодорхойлох вэ?

 

Гэрэл зургийг MPA агентлагийн онцгой зөвшөөрөлтэйгөөр ашиглав

Даниэл: Хөгжим бол миний хувьд чичирхийлсэн долгион. Бүхэлдээ биеийг хөдөлгөх чадалтай. Хүмүүс хөгжмийг сонсоод л өөрийн эрхгүй хөдөлдөг. 

Сэтгэл болоод биеийн хувьд хөгжим бол маш чухал зүйл. Маш амар амгаланг мэдрүүлдэг. 

Жош: Таны хэлсэн шиг хөгжим бол бүгдийн мэдрэмжийн хэл. Биднийг хөгжмөө тоглож, дуугаа дуулахад хэлийг нь ойлгохгүй байлаа ч хүмүүс үүнийг мэдэрдэг. Хөгжим бол олон улсын хэл юм. Би ингэж л тодорхойлж хэлнэ дээ.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Кэй: Бид бүгдээрээ анх удаа энэ бүрэлдэхүүнээрээ тоглох гэж байна. Өмнө нь нэг удаа хамт бэлтгэл хийсэн. Хөгжим бол миний хувьд сэтгэл хөдлөлөө илэрхийлэх зүйл минь. Амьдралаа хүүрнэх боломж, ялангуяа Күийр хүмүүсийн хувьд эмчилгээ юм. 

- Та бүгдийн дараагийн зорилго юу вэ?

Жина: -Энэ бол тун онцлог бүрэлдэхүүн. Өөр өөр мужид амьдарцгаадаг бид нар хамтдаа Монголд ирсэн байгаа нь тун гайхалтай байгаа биз? Би дараа нь Морокко руу явна. Засгийн газрын өөр нэгэн хөтөлбөр байх юм. Элай дараа нь надтай нэгдэх болов уу. Бид бүгд өөр өөрийн зорилготой. Тиймээс тус тусдаа хариулна байх.

Даниэл: Би дараа нь өөрийн уран бүтээлдээ орно. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Жош: Үүний дараа Мексик руу явна. Дараа нь би Нью Иоркт Бродвей шоуны хөгжим тоглох юм. 

Кэй: Сэинт Луист хамтлагтай. Бид хотдоо тоглолтоо хийх юм. Мөн надад өөр нэг төсөл бий. Таван гишүүнтэй үлээвэр хөгжмийн хамтлагийн продюсероор ажиллах гэж байгаа.

- Монголын уншигчдад төдийгүй дэлхий дахинд хүргэхийг хүсэж байгаа таны үг юу байх бол?

Жина: -Би өмнө нь өөрийгөө “жижигхэн” мэтээр мэдэрдэг байв. Олон эмэгтэй надтай ижил зүйлийг мэдэрсэн байх. Учир нь бид нийгмийг манлайлах, дуу хоолойгоо хүчтэйгээр хүргэхэд “жижигдэх” үе их бий. Гэхдээ би дуу хоолойгоо илэрхийлэх, хүмүүст сонсохыг хүссэн зүйлийг нь хүргэх замаа олж чадсан маань намайг аварсан.

Хэлэхийг хүсдэг зүйл маань хэн нэгэн гэрэлтэхэд бусад хүнд ч бас гэрэлтэх урам зориг орж байдаг. Чиний гэрэл өөр нэгнийг гэрэлтүүллээ гээд чинийх бөхөхгүй шүү дээ.

Тиймээс хэрэв би гэрэлтэж байвал өөр хэн нэгэн намайг хараад “Би ч бас ингэж чадах юм байна” гэсэн урам орно гэсэн үг. Миний зорилго бол өөрийгөө ямар нэг зүйлээр үл хязгаарлан илүү хүчтэй байх юм. Бид дуу хоолойгоо нэгтгэх хэрэгтэй, өөрсдийн онцгой түүхийг бусдадаа хуваалцах ёстой.

Жина Чавез болон түүний хамтлагийнхны тоглолтын хуваарь:

Наймдугаар сарын 27-нд

14:00 - МҮЭ-ийн ордонд Күийр театр
20:30 - "Fat Cat Jazz Club"-т концерт

Наймдугаар сарын 28-нд

16:00 - Америкийн төвд "Тэгш эрх, бахархал"-ын яриа
18:00 - "Cosy Club Ulaanbaatar"-т Күийр түүхүүд