Ил задгай зургуудаа порно сайтад алдсан эмэгтэйн хохирлыг АНУ-ын шүүх $1.2 тэрбумаар барагдуулах шийдвэр гаргав

АНУ-ын Техас мужийн шүүх өчигдөр “Revenge porn” (порно өшөө авалт) хэмээх шинэ төрлийн гэмт хэргийн хохирогч эмэгтэйд $1.2 тэрбумыг төлүүлэх шийдвэр гаргажээ.

Хохирогч эмэгтэйн хуучин найз залуу дотно харилцаатай байх үедээ нүцгэн, ил задгай авхуулсан гэрэл зургуудыг нь салсныхаа дараа порно сайтуудад тарааж хорлосон юм байна.

Тэд 2016 оноос 2021 оныг хүртэл дотно харилцаатай байжээ. Эмэгтэй 2022 онд шүүхэд хандахдаа хохирлын $100 саяыг экс найз залуугаасаа нэхэмжилж байжээ.

Тэгвэл шүүх шийдвэр гаргахдаа үүнийг нь олон дахин өсгөсөн байна.

“Шийтгэлийн асар их хэмжээ нь бусдад анхааруулга болж, дахин ийм хэрэг гарахаас урьдчилан сэргийлж чадна гэдэгт бид найдаж байна” гэж шүүхийн дүгнэлтэд бичжээ.

Хуучин найз бүсгүйгээ хорлох жигшүүрт үйлдлүүд нь гэмт этгээдийн шийтгэлийг улам хүндрүүлсэн байна.

Тэрбээр зургуудыг тараасныхаа дараа хохирогч эмэгтэйд “Чи үлдсэн бүх амьдралаа интернэтээс өөрийгөө цэвэрлэх бүтэлгүй үйлсэд зориулах болно. Чамтай уулзсан хүн бүр чиний түүхийг сонсох болно. Ангуучлах үйлсэд чинь амжилт хүсье” гэсэн мессэж илгээж байжээ.

Шүүх эмэгтэйн сэтгэл санааны хохирлыг барагдуулахад $200 сая, бусдад сургамж болгох зорилготой шийтгэлд $1 тэрбумыг гэмт этгээдээр төлүүлэх шийдвэр гаргасан байна.

Сүүлийн жилүүдэд АНУ-д “Revenge porn” төрлийн гэмт хэрэг нэмэгдэж, шийтгэл нь улам чангарч байгаа.

2018 онд ижил төстэй хэргийн хохирогч болсон Калифорни мужийн эмэгтэйн хохирлыг $6.8 саяар барагдуулах шийдвэрийг шүүх гаргаж байв.

Өнөөдөр Массачусетс, Өмнөд Каролинагаас бусад АНУ-ын бүх муж ийм төрлийн гэмт хэргийг шийтгэх хуультай болжээ.

Эх сурвалж: BBC