О.Ганчулуун: Сэтгэл гутралын үед амьдралд өчүүхэн ч сайхан зүйл байхгүй мэт санагдаж, үг яриа цөөрөх шинж илэрдэг
Сэтгэл гутрах эмгэгийн талаар Зөвлөх зэргийн эмч, клиникийн профессор О.Ганчулууны өгсөн зөвлөгөө, мэдээллийг хүргэж байна.
Сэтгэл гутрал нь гаднын тодорхой шалтгаангүйгээр гуниглах, гутрах, сэтгэлээр унах, түгшүүрлэх, сэтгэл дундуур болох, сэтгэл тавгүйдэх зэрэг илрэл бүхий сэтгэлийн сөрөг хөдлөл мөн. Эдгээр шинж тэмдэг удаан хугацаагаар үргэлжилж, хүний хэвийн үйл ажиллагааг алдагдуулахад хүргэвэл эмгэг гэж үзнэ гэдгийг О.Ганчулуун эмч хэллээ.
"Сэтгэцийн эрүүл мэндийн боловсролыг хүн бүрд" аяны хүрээнд тэрбээр дараах зөвлөгөө, мэдээллийг өгөв.
Дэлхийн Эрүүл Мэндийн Байгууллага (ДЭМБ)-ын тайлан мэдээллээс харвал
- Дэлхий дээр сэтгэл гутралын эмгэгтэй 350 сая орчим хүн байна.
- Сэтгэл гутрал нь амиа хорлох үйлдэлд хүргэдэг. Жил бүр 800,000 хүн амиа хорлож, нас барж байгаа бөгөөд эдгээрийн ихэнх нь 15-29 насныхан байна.
- Эмэгтэйчүүдэд илүү тохиолддог.
Сэтгэл гутрах эмгэг нь өсвөр залуу насанд эхэлж, цаашилбал сургуульд сурах, ажил хөдөлмөр хийх, гэр бүл болж амьдрахад нөлөөлж, хөдөлмөрийн чадвар алдалтад хүргэдэг тэргүүлэх шалтгаануудын нэг, дахих хэлбэрээр илэрдэг архаг эмгэг юм.
Насанд хүрэгчдийн 10-15 хувьд, өсвөр насны хүүхдийн 5-10 хувьд нь сэтгэл гутрах эмгэг тохиолддог.
Сэтгэл гутрах эмгэгт нөлөөлөх хүчин зүйл нь сэтгэл зүйн нөлөө юм. Энэ нь амьдралд тохиолдож байгаа томоохон үйл явдлууд, стресстэй холбоотой.
Сэтгэл гутрах эмгэгийн үед хэд хэдэн эмнэл зүйн шинж тэмдэг илэрдэг. Тухайлбал
- Зан, сэтгэл нь гуниг гутралын байдалд орно. Сөрөг агуулгатай сэтгэлийн хөдөлгөөн үүсэж, амьдралд өчүүхэн ч сайн сайхан зүйл байхгүй мэт санагдана. Ирээдүйн амьдралынхаа төлөө санаашран зовно. Нүүрний баясгалангүй болж гөлийнө.
- Сэтгэхүй удаашрах (Бодол санаа үүсэх явц нь удааширч, үг яриа цөөрнө. Асуултад ганц нэг үгээр сонсогдох төдий хариулж, бодлогошрон сууна)
- Өөрийгөө буруутгах, зэмлэх, үгүйсгэх дэмийрлийн үзэл санаа, амиа хорлох бодол санаа төрж, амиа хорлох оролдлого хийнэ. Мөн ирээдүйгээ гутранги байдлаар төсөөлнө.
- Үйл хөдөлгөөн нь удаашрах (Орчиндоо ямар ч сонирхолгүй, юунд ч идэвхгүй, гөлөрч сууна. Зарим тохиолдолд бүрэн хөдөлгөөнгүй хөшлийн байдалд орно)
Сэтгэл гутрал гэдэг бол бие махбодын өвчин, сэтгэцийн өвчний аль ч үед илэрч болдог. Зарим тохиолдолд сэтгэл гутрал нь тодорхой шалтгаангүйгээр үүсэх явдал бий.
Бие махбодын талаас
- Зүрхний цохилт олшрох
- Хүүхэн хараа өргөсөх
- Өтгөн хатах, биеийн жин буурах
- Арьс хуурайших
- Эмэгтэйчүүдийн сарын тэмдэг саатах зэрэг шинж тэмдэг илэрч болно.
Сэтгэл гутрал нь эмчлэгдэх боломжтой эмгэг гэдгийг О.Ганчулуун эмч ярилаа.
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
