Монгол Улсад холбогдох хөрөнгө оруулалтын маргааныг хянан шийдвэрлэх арбитрын хурал АНУ-д болов

"Даблью Эм Майнинг" ХХК-ийн нэхэмжлэлтэй Монгол Улсад холбогдох хөрөнгө оруулалтын маргааныг хянан шийдвэрлэх арбитрын хурал АНУ-ын Вашингтон хотноо байрлах Дэлхийн банкны дэргэдэх Хөрөнгө оруулалтын маргаан хянан шийдвэрлэх олон улсын төвд 2023 оны тавдугаар сарын 30-ны өдрөөс зургаадугаар сарын 8-ны өдрүүдэд болжээ.

Тус компани нь АНУ-д бүртгэлтэй хуулийн этгээд бөгөөд Монгол Улсын эсрэг Хөрөнгө оруулалтыг хөхиүлэн дэмжих, харилцан хамгаалах тухай хоёр улсын хооронд 1994 онд байгуулсан хоёр талт гэрээгээр хүлээсэн үүргээ зөрчсөн гэх үндэслэлээр 2021 онд арбитрын маргааныг үүсгэсэн байна.

Монгол Улсын Засгийн газрын Ажлын хэсгээс нэхэмжлэгчийн шаардлагын хууль зүйн үндэслэлийг судалж, холбогдох тайлбар, нотлох баримтыг гарган шаардлагыг няцааж ажиллалаа хэмээн Хууль зүйн яамнаас мэдээлэв.

Арбитрын бүрэлдэхүүнд даргалагч арбитрчаар Эдуардо Ж.Зулета, арбитрчаар Альберт Яан ван ден Берг болон Стефен Л.Драймер нар ажиллаж байгаа бол хуулийн зөвлөхөөр Монгол Улсыг олон улсын хуулийн фирм болох “Херберт Смит Фрийхиллс”, Даблью Эм Майнинг компанийг Канадын “Мак Миллан“ тус тус төлөөлөн ажиллаж байгаа юм байна.

Арбитрын бүрэлдэхүүн шийдвэрээ тодорхой хугацааны дараа гаргах бөгөөд уг шийдвэрийг Хөрөнгө оруулалтын маргаан хянан шийдвэрлэх олон улсын төвийн дүрмийн дагуу олон нийтэд нээлттэй мэдээлэх ажээ.