Уншиж байна ...
Зураг
Зураг
ХУУЧИРСАН МЭДЭЭ: 2023/06/07-НД НИЙТЛЭГДСЭН

Энэтхэгт баригдаж буй гүүр жил орчим хугацааны дотор хоёр дахь удаагаа нурав

С.Мөнхцэцэг, ikon.mn
2023 оны 6 сарын 7
iKon.MN
Зураг зураг

Энэтхэгийн зүүн бүсийн Бихар мужийн нутагт Ганга мөрний дээр баригдаж буй дөрвөн эгнээ замтай, бетон гүүр жил гаруй хугацааны дотор хоёр дахь удаагаа нуржээ.

3 км урт гүүрний байгууламж ариун гэгддэг мөрний усанд нуран унаж буйг харуулсан дүрс бичлэгүүд Ням гарагт нийгмийн сүлжээнд цацагдсан юм.

Султанганж нэртэй энэ гүүрний бүтээн байгуулалт 2017 онд эхэлж байв. Уг гүүр нь Ганга мөрний хоёр эргийг холбодог Бихар мужийн бусад гурван гүүрний ачааллыг бууруулах зорилготой юм.

Өнгөрсөн оны дөрөвдүгээр сард гүүр эхний удаа нурж байжээ.

Тэр үед гүүр яагаад нурсан талаар эрх баригчид тодорхой мэдээлэл өгөөгүй юм. Энэ удаагийн нуралт өмнөхтэй ижил шалтгаантай эсэх нь ч тодорхойгүй байна.

Даваа гарагт Бихар мужийн захирагч Нитиш Кумар гүүр нурах үед хүний амь нас, эрүүл мэнд хохирсон эсэхийг мөрдөн шалгах үүрэг өгчээ.

Гүүрний зураг төслийг гүйцэтгэсэн Канадын компани McElhanney байгууламжийн зарим хэсэг нурсныг хүлээн зөвшөөрөөд үүнтэй холбоотой аливаа мөрдөн шалгах ажилд эрх баригчидтай хамтрахад бэлэн байгаагаа илэрхийлсэн байна.

Төслийг гүйцэтгэгч Энэтхэгийн SP Singla Construction компани одоогоор ямар нэг мэдэгдэл гаргаагүй байна. Султанганж гүүр нурсан нь Энэтхэгийн барилгын материалын стандарт, чанарын асуудлыг хурцаар хөндөж байгаа юм.

Өнгөрсөн онд Энэтхэгт нурсан гүүр ганц Султанганж байгаагүй. Аравдугаар сард Гужарат мужийн Морби хотын ойролцоох дүүжин гүүр нурснаас 135 хүний амь үрэгдэж байжээ.

Эх сурвалж: CNN