АНУ-ын нэг тосгон шоо хаях аргаар сонгуулийнхаа үр дүнг шийджээ

Энэ долоо хоногт АНУ-ын Висконсин мужийн нэг тосгон удирдах зөвлөлийн даргаа сонгохдоо шоо хэрэглэжээ.

Систер Бэй тосгоны удирдах зөвлөлийн даргын сонгуульд Нэйт Белл, Роб Зошке нар өрсөлдсөн ч хоёр нэр дэвшигч адилхан 256 саналтай тэнцсэн юм байна.

Ингээд удирдах зөвлөлийн гишүүд ялагчийг шоо хаях замаар тодруулахаар тохиролцжээ. Шоо хаяхад Нэйт Белл өмнөх дарга Роб Зошкег 6:2 харьцаагаар ялж, шинэ дарга болсон байна.

Тосгоны захиргааны ажилтан Хэйди Тейк өмнө нь бас сонгуулийн маргааныг шийдвэрлэхэд нэр бичсэн цаас сугалах, хөзөр татах, зоос шидэх зэрэг арга хэрэглэж байсан тухай NBC26 сувагт ярьжээ.

АНУ-ын жижиг хот тосгонуудад ийм аргаар сонгуулийн үр дүнг тодруулах тохиолдол өмнө нь ч цөөнгүй гарч байсан гэнэ.

Тухайлбал өнгөрсөн оны арванхоёрдугаар сард Калифорни мужийн Ричмонд хотын удирдах зөвлөл даргаа нэр бичсэн цаас сугалах аргаар тодруулж байжээ. Тухайн үед хоёр нэр дэвшигч Эндрью Батт, Сезарь Зепеда нар адилхан 1,921 санал аваад байсан юм байна.

Калифорни мужийн өөр нэг жижиг хот Айзлтон арваннэгдүгээр сард зоос шидэх аргаар хоёр нэр дэвшигчийн хайныг хагалж байжээ.

Эх сурвалж: BBC