Хувийн ашиг сонирхол, хөрөнгө орлогын мэдүүлгийг шинэ маягтаар авч эхэлжээ

Гэрэл зургийг mpa.mn

Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасны дагуу жил бүрийн хоёрдугаар сарын 15-ны дотор хуулийн үйлчлэлд хамрагдах албан тушаалтан Хувийн Ашиг Сонирхлын Мэдүүлэг болон Хөрөнгө, Орлогын Мэдүүлэг(ХАСХОМ)-ээ шинэчлэн гаргах үүрэгтэй.

Улсын Их Хурлын Хууль зүйн байнгын хорооны 2024 оны “Журам, маягт, жагсаалт шинэчлэн батлах тухай” 05 дугаар тогтоолоор ХАСХОМ-ийн маягт шинэчилснийг үндэслэн уг мэдүүлгийг нөхөх зааврыг Авлигатай Тэмцэх Газар(АТГ)-ын даргын 2024 оны А/96 дугаар тушаалаар баталж, 2025 оны нэгдүгээр сарын 1-ний өдрөөс эхлэн мөрдөж байна.

Мэдүүлэг гаргагч нь 2024 оны ХАСХОМ-т өөрийн давхар эрхэлдэг ажлын мэдээлэл, мөн гэр бүлийн гишүүдийн болон өөрийн эзэмшдэг тоног төхөөрөмж, виртуал хөрөнгийг мэдүүлэхээс гадна өөрийн болон гэр бүлийн гишүүдийн олсон орлогыг татвар, шимтгэл төлсний дараах дүнгээр мэдүүлэх зэрэг шинэлэг зохицуулалттай болсон байна.

Ийнхүү мэдүүлэг гаргагч нь АТГ-ын https://meduuleg.iaac.mn/ цахим системд нэвтрэн 2024 оны ХАСХОМ-ээ шинэчлэн гаргаж, 2025 оны хоёрдугаар сарын 15-ны дотор баталгаажуулан, баталгааны хуудсыг зохих шатны байгууллагын мэдүүлгийг бүртгэх, хадгалах эрх бүхий албан тушаалтан (ЭБАТ)-д хүлээлгэн өгөх үүрэгтэй.

Мэдүүлгийн маягт нөхөх заавартай танилцах бол ЭНДЭЭС үзнэ үү.

Эх сурвалж: Авлигатай Тэмцэх Газар