Крымийн төмөр замаар тээвэрлэж байсан Оросын Калибр пуужингийн цувааг дэлбэлснээ Украины тал мэдэгджээ
Крым дэх Оросын Хар тэнгисийн флотод хүргэхээр төмөр замаар тээвэрлэж байсан Калибр пуужингийн цувааг дэлбэлснээ Украины эрх баригчид саяхан мэдээллээ.
“Түр эзлэгдсэн Крымийн хогийн хойд хэсэгт орших Жанкой хотын дэргэд болсон дэлбэрэлтээр төмөр замаар тээвэрлэгдэж байсан Оросын Калибр-КН далавчит пуужингууд устлаа” гэж Украины тагнуулын алба Улаанбаатарын цагаар өнөөдөр өглөө сошиал хуудсандаа мэдээлсэн байна.
Ингэхдээ цохилтыг өөрсдөө гүйцэтгэсэн эсэх, ямар зэвсэг хэрэглэсэн талаараа дурдсангүй.
Дээрх пуужингуудаар Оросын Хар тэнгисийн флотын шумбагч хөлгийг зэвсэглэх гэж байсан гэнэ.
Оросоос томилогдсон Жанкой хотын захирагч Игорь Ирвин хотод нь дроноор халдсаны улмаас сумны хэлтэрхийд 33 настай нэг иргэн шархадсан тухай мэдээлжээ.
Энэ үеэр сургууль, дэлгүүрийн байр шатаж, эрчим хүчний холболт тасалдсан тухай тэр орон нутгийн телевизийн сувагт ярьсныг ТАСС агентлаг мэдээлсэн байна.
Харин Крымийн захирагч Сергей Аксёнов дрон биш, агаарын довтолгооноос хамгаалах зориулалттай пуужингуудыг Жанкой хот руу харвасан гэж мэдээлжээ.
Гэхдээ аль аль нь зэвсгийн цуваа агаарын цохилтод өртсөн тухай огт дурдаагүй байна.
Харин Украины зарим хэвлэл Жанкой орчимд Ираны Шахед 136/131 дроны хөдөлгүүрийнхтэй адил чимээ сонсогдсоны дараа дэлбэрэлт болсон тухай мэдээлжээ.
Калибр төрлийн далавчит пуужинг Оросын арми Украины газар нутагт цохилт өгөхдөө тогтмол хэрэглэж байгаа. 2022 оны долдугаар сард шумбагч хөлгөөс харвасан Калибр пуужин Украины төв бүсийн Винница хотод унах үеэр 23 энгийн иргэн алагдсаны гурав нь хүүхэд байв.
Тухайн үед Оросын тал энэ цохилтыг Украины агаарын хүчний командлал, Өрнөдийн зэвсэг нийлүүлдэг төлөөлөгчийг устгах зорилготой гэж тайлбарлаж байжээ.
ОХУ-ын бүрэлдэхүүнд нэгтгэсний есөн жилийн ойн өдрийг нь давхцуулан ерөнхийлөгч Владимир Путин хоёр хоногийн өмнө Крымийн хойгт зочилж байв.
Эх сурвалж: Aljazeera
