Сорьцын баталгаажилтад хамрагдаагүй мөнгөн аяга худалдаалж байжээ
Шударга Өрсөлдөөн, Хэрэглэгчийн Төлөө Газар(ШӨХТГ)-аас Цагаан сарын баярыг угтан нийслэлийн Чингэлтэй дүүргийн Самбуугийн гудамжинд байрлах алт, мөнгөн эдлэлийн дэлгүүрүүдийн худалдаа эрхлэгчдийн үйл ажиллагаанд хяналт шалгалт хийж, зарим худалдаа эрхлэгчид мөнгөн торгуулийн арга хэмжээ авлаа.
Үнэт металл эдлэл үйлдвэрлэгч, худалдаа эрхлэгчид нь аливаа алт, мөнгөн эдлэл болон мөнгөн аягыг худалдаалахдаа сорьцын хяналтын баталгаажилт хийлгэж стандартын шаардлагад нийцсэн эсэхийг урьдчилан тодорхойлуулсны үндэс дээр тухайн бүтээгдэхүүний шинж чанарын талаар хэрэглэгчийн бодит мэдээлэл авах эрхийг хангах замаар худалдаалах ёстой.
Гэтэл сорьцын баталгаажилтад хамрагдаагүй мөнгөн аяга худалдаалж байгаа нь Хэрэглэгчийн эрхийг хамгаалах тухай хуулийн 12.1-т “Худалдагч гүйцэтгэгчийн зах зээлд нийлүүлж байгаа бараа, ажил үйлчилгээ нь заавал мөрдөх стандартын болон техникийн зохицуулалтын шаардлагыг хангасан байна” гэж заасныг зөрчсөн байх тул Зөрчлийн тухай хуулийн 10.2 дугаар зүйлийн 2-т зааснаар мөнгөн торгууль ногдууллаа.
Хэрэглэгчид өөрийн хэрэгцээнд зориулан аливаа худалдан авалт хийхдээ тухайн бүтээгдэхүүнд баталгаажилт хийлгэж, чанарын шаардлага хангасан эсэх талаар үнэн, бодит мэдээлэл авах замаар сонголтоо зөв хийхийг ШӨХТГ-аас сэрэмжлүүлж байна.
Хуулийн заалт:
Зөрчлийн тухай хууль
10.2 дугаар зүйл.Хэрэглэгчийн эрхийг хамгаалах тухай хууль зөрчих
2.Үйлдвэрлэгч, худалдагч, гүйцэтгэгчийн үүргээ хэрэгжүүлээгүй бол хүнийг таван зуун нэгжтэй тэнцэх хэмжээний төгрөгөөр, хуулийн этгээдийг таван мянган нэгжтэй тэнцэх хэмжээний төгрөгөөр торгоно.
Эх сурвалж: ШӨХТГ
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
2 СЭТГЭГДЭЛТЭЙ
|
