"Эрдэнэс Монгол" ХХК-ийн ахлах менежерийн шалгалтад тэнцсэн долоон хүний нэрийг зарлав

Гэрэл зургийг MPA.mn

"Эрдэнэс Монгол" ХХК-ийн ажлын байрны нээлттэй сонгон шалгаруулалт дууссантай холбогдуулан Засгийн Газрын Хэрэг Эрхлэх Газар(ЗГХЭГ)-ын дарга Д.Амарбаясгалан болон оролцогчдын төлөөллүүд өнөөдөр мэдээлэл хийлээ.

ЗГХЭГ-ын дарга Д.Амарбаясгалан: "Эрдэнэс Монгол" ХХК-ийн боловсон хүчнийг нээлттэй зохион байгуулж, мэргэжилтнүүдийг эхнээс нь томилж байна. Сонгон шалгаруулалтад давхардаагүй тоогоор 2,900, давхардсан тоогоор 3,400 гаруй иргэн бүртгүүлсэн. Үүнээс шалгалтад 2,084 хүн орох эрхтэй болж, 1,215 хүн ирж оролцсон. Нэг ажлын байр буюу удирдах албан тушаалын ахлах менежер, менежерийн байранд долоо орчим хүн ярилцлагын шалгалтад орохоор оноогдсон. Нийтдээ 434 хүн ярилцлагад орж хамгийн өндөр оноотой хүмүүс өнөөдөр ажлын байрандаа томилогдож байна. 

Шалгалтын үйл ажиллагаанд төрөөс хяналт тавих байдлаар оролцсон, тестийг төрийн албаны зөвлөлийн шалгалтын программ дээр үндэслэж, хөндлөнгийн шалгалтын баг зохион байгуулж ажилласан. Ярилцлагын шалгалтыг Их, дээд сургууль, хувийн аж, ахуйн нэгж, Монгол Улсын хэмжээнд үйл ажиллагаа явуулж байгаа хүний нөөцийн мэргэшсэн байгууллага оролцсоноор онцгой болсон. 

“Шинэ сэргэлтийн бодлогын хурдасгуур төв”-ийн гүйцэтгэх захирал Б.Дөлгөөн: 

1. Ил тод байлгахын тулд хөндлөнгийн хяналтын багийг 17 гишүүнтэйгээр дан хүний нөөц, иргэний нийгмийн байгууллагуудаас бүрдүүлэн тест, ярилцлагын үеэр бүх талаар хяналт тавьж ажиллуулсан
2. Тест боловсруулсан баг хуулийн болон түүхийн асуултыг огт оруулалгүй, 70 асуултаас 40-ийг ур чадварын, 15-ыг компанийн менежмент болон засаглал, үлдсэн 15-ыг авлигын тухай хууль болон, хөгжлийн бодлогын асуулт байхаар оруулсан.

Өнгөрсөн Пүрэв гарагт ярилцлага дуусаж, Баасан гарагт

• Ахлах менежер дээр долоон газрын 21 нэр
• Менежерийн түвшинд есөн хэлтсийн 27 нэр
• Ахлах мэргэжилтэн дээр долоон газрын 21 нэр
• Мэргэжилтэн дээр долоон газрын хоёр группийн 63 нийт 132 нэрийг С.Наранцогт гүйцэтгэх захиралд хүлээлгэн өгсөн.

Нээлттэй сонгон шалгаруулалт шударга явагдсан бөгөөд ямар нэг алдаа гарсан гэж үзэхгүй байна. Хэрэв сонгон шалгаруулалтын явцад эргэлзэж байвал бичлэг болон онооны дүгнэлтийн архивыг харж болно.

Монголын Үндэсний Худалдаа Аж Үйлдвэрийн Танхимын ерөнхий нарийн бичгийн дарга С.Баясгалан: Ярилцлагын шатны сонгон шалгаруулалтыг нэгдүгээр сарын 30-наас хоёрдугаар сарын 2-ны өдрүүдэд МҮХАҮТ-ын байранд зохион байгуулсан. Сорилын шалгалтад нийт 434 хүн бүртгүүлснээс 408 хүн оролцсон нь ирц 93.8%, оролцогчдын 58% нь эрэгтэй, 41.4% эмэгтэй байсан. 

Нийт Монголын тэргүүлэх ААН-үүдийн удирдлагууд, хүний нөөц, МУИС, СЭЗИС, ТУА зэрэг Эрдэм шинжилгээний байгууллага, Төрийн удирдлагын байгууллага, Иргэний нийгмийн байгууллага, хүний нөөцөөр мэргэшсэн ТББ-ууд зэрэг 29 байгууллагын 37 хүн ярилцлагын шалгалт авахад гар бие оролцлоо. Ярилцлагын дундаж оноо 21.89 бол хамгийн багадаа 10, ихдээ 30 оноо авсан. Хазайлт 3.5 байгаа гэсэн мэдээллийг өгөв.

"Эрдэнэс Монгол" ХХК-ийн гүйцэтгэх захирал С.Наранцогт: Шалгалтад идэвх зүтгэлтэй ажилласан байгууллагууддаа гүн талархлаа илэрхийлж байна. Ажлын хэсгээс хөдөлмөрийн хуулийн дагуу нийт орон тоо 88, нөөц найм байгаа.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Газрын ахлах менежерийн түр орон тоонд шалгарсан долоон хүний нэрийг ирүүлснээс

• Төрийн өмчит, хувийн хэвшлээс тав,
• Төрийн захиргааны төв байгууллагаас нэг,
• "Эрдэнэс Монгол" компаниас нэг хүн шалгарсан.

Хэлтсийн менежерийн долоон ажлын байранд

• Төрийн өмчит, хувийн хэвшлийн байгууллагаас дөрөв,
• Төрийн байгууллагаас хоёр,
• "Эрдэнэс Монгол" ХХК-аас нэг хүн шалгарсан байна.

Үлдсэн ажлын байранд сонгох боломжтой гурван хүний нэр ирүүлсэн. Хоёр үе шатны шалгалтын нийлбэр оноогоор эхэнд жагссаныг нь томилно. Нийт шалгарсан хүмүүсийн ашиг сонирхлын мэдүүлгийг Авлигатай Тэмцэх Газар хүргүүлээд зөрчил үүсээгүй нөхцөлд ажилдаа томилогдох тушаал нь гарах юм.

Сонгон шалгаруулалтад тэргүүлж, ашиг сонирхлын мэдүүлгээ өгөхөөр ирсэн шинэ менежерүүдийг дурдвал:

1. Захиргаа, удирдлагын газрын ахлах менежерээр Б.Ундармаа
2. Дотоод аудит, эрсдэлийн удирдлагын газрын ахлах менежерээр Г.Ханцоож
3. Нэгдсэн стратеги, бизнес хөгжлийн газрын ахлах менежерээр Ж.Бажуна
4. Санхүүгийн нэгдсэн удирдлагын газрын ахлах менежерээр Ц.Сэргэлэн
5. Төслийн судалгаа, үнэлгээний газрын ахлах менежерээр Я.Өлзийболд
6. Үйлдвэр, технологийн ахлах менежерээр Д.Даваадорж
7. Хууль, эрх зүйн газрын менежерээр М.Золжаргал тус тус шалгарч сэтгэгдлээ хэлэв.