• 1 сарын 10, Баасан
|
Уншиж байна ...
Зураг
Зураг
ХУУЧИРСАН МЭДЭЭ: 2022/12/06-НД НИЙТЛЭГДСЭН

СУДАЛГАА: Эрдэнэтийн ус хамгийн чанартай бол Говь-Алтай аймгийн төвөөс стандартад нийцсэн ус олдоогүй

П.Сайнжаргал, IKON.MN
2022 оны 12 сарын 6
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

"Монгол Улсын ундны усны чанарын судалгааны үр дүнг хэлэлцэх нь” уулзалт өнөөдөр Милленниум плазад боллоо.

Энэхүү судалгаанд Монгол Улсын 21 аймгийн 360 сум, суурин газар, хилийн боомт, Улаанбаатар хотын есөн дүүрэг, төмөр зам дагуух 128 өртөө, зөрлөг, суурин газрын ус хангамжийн эх үүсвэрийн гүний худаг, уст цэг хамрагдаж судалгааны ажилд зориулж 3,582 сорьц авсан байна.

"Монголын ард түмний эрүүл мэндийг хамгаалахын тулд усны чанарт онцгой ач холбогдол өгөх ёстой"

зураг
 
Гэрэл зургийг MPA агентлагийн онцгой зөвшөөрөлтэйгөөр ашиглав

2019-2022 оны хооронд хийсэн ундны усны судалгааны талаар Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлийн дарга Ж.Батсуурь дараах мэдээллийг өгөв. 

Ундны усны микро элементүүдийн судалгааг хийж, 88 үзүүлэлтийг нь шинжилсэн. Судалгааны хүрээнд, 

  • Нэгдүгээрт, нян бактери болон бохирдлыг үзсэн. 
  • Хоёрдугаарт, тухайн бүс нутгийн усны найрлагын стандарт хэмжээг харьцуулж судалсан.

Үүнээс харахад ундны усан дахь зарим элемент стандарт хэмжээнээс хэтэрсэн, буурсан үзүүлэлт ажиглагдлаа.

Улаанбаатар хотын ундны усанд фторын агууламж бага байсан. Харин говийн бүсийн зарим нутагт фторын агууламж өндөр байгаа юм. Тиймээс ч агууламжийг стандарт хэмжээнд нийцүүлэх нь чухал. Өөрөөр хэлбэл, фторын өндөр агууламжтай бүс нутагт энэ хэмжээг бууруулах, бага байгаа тохиолдолд нэмэгдүүлж унданд хэрэглэх ёстой. Ингэснээр хүнийг эрдсийн дутагдалд орохоос сэргийлж, бодисын солилцооны тэнцвэрт харьцаа хадгалагдах юм.  
Монголын ард түмний эрүүл мэндийг хамгаалахын тулд усны чанарт онцгой ач холбогдол өгөх ёстой. Тиймээс ч 360 гаруй суурин газар, төмөр замын өртөө зөрлөгүүдэд дээрх судалгааны ажлыг дөрвөн жил хийсэн. Судалгааны явцад стандартад тэнцээгүй зарим худгийг хаалгасан. Тухайлбал, Дундговь, Дархан-Уул аймгийн зарим сумын худаг стандартад огт нийцээгүй байсан. Тиймээс хаалгасан.
Ундны ус хэрэглэхдээ шүүлтүүр тавьснаар зарим хатуу элементийг нь бууруулдаг. Жишээлбэл, Дорнод аймгийн ундны усанд төмрийн агууламж өндөр байсан. Иймээс тухайн бус нутгийн иргэд төмрийн агууламжийг нь бууруулж унданд хэрэглэвэл тохиромжтой. 
Хамгийн чанартай ус хаана байна вэ гэвэл, Орхон аймгийг онцолно. Тус аймгийн иргэд Булган аймгийн нутаг дэвсгэрээс шугам сүлжээгээр дамжуулан ундны усаа татаж авдаг. Эрдэнэтийн иргэд хамгийн сайн ус хэрэглэдэг гэдэг нь дээрх судалгааны үр дүнгээс харагдаж байгаа юм. Өөрөөр хэлбэл, ундны ус нь бүх аймгуудаас давуу чанартай юм байна.
Харин Говь-Алтай аймгийн ундны ус хатуулаг өндөртэй. Аймгийн төв орчмоос сорьц авахад чанарын шаардлага хангасан ус олдоогүй. Гэхдээ энэ асуудлыг шийдэхийн тулд Завхан аймгийн Гэгээн нуурын уснаас Говь-Алтай аймгийн төв рүү шугам хоолойгоор ус татсан байдаг. Тиймээс одоо Говь-Алтайн иргэд стандартад нийцсэн ус хэрэглэж байгаа. 

Бидний өдөр тутамдаа ууж, хэрэглэж байгаа ус чанарын шаардлага хангасан тохиолдолд монголчууд эрүүл байх боломжтой. Бодисын солилцооны өвчин, эрдсийн дутагдал эсвэл илүүдэл зэрэг нь ундны усны стандарттай шууд холбоотой гэдгийг тэрбээр ярьж байлаа.