Монголын Хөлбөмбөгийн Холбоо сэхээний тасагт "ёолж" байна

Монголын Хөлбөмбөгийн Холбоо (МХБХ)-ны Зөвлөлийн ээлжит бус хурлыг өнөөдөр буюу нэгдүгээр сарын 10-ны Баасан гарагт хуралдуулах шийдвэрийг тус холбооны Ерөнхийлөгч М.Болд энэ сарын 7-нд гаргажээ.

Уг хурлаар дөрвөн асуудал хэлэлцэхээр болсныг мэдэгдсэн юм. 

Өнгөрсөн оны арванхоёрдугаар сарын 23-нд Монголын Хөлбөмбөгийн Холбоо (МХБХ)-ны Ерөнхий нарийн бичгийн дарга Т.Дагвадорж хэвлэлийн хурал зарласан. Өмнөх долоо хоногт нь холбооны Техникийн хэлтсээс шаардлага хүргүүлсэн тул санхүүгийн тайлангаа зарласан юм.

Тус хурлаар Т.Дагвадорж нь хөлбөмбөгийн холбоог нийт ₮3.8 тэрбумын өртэй байгааг ил тод мэдэгдсэн билээ.

Түүнчлэн уг хурлаар "Advantage" хөтөлбөрийн мөнгөөр ажилчдын цалинг олгосон. Нийгмийн даатгалын өр төлбөр барагдсан гэж ярьсан ч начир дээрээ ажилчдын нийгмийн даатгал өнгөрсөн оны наймдугаар сараас хойш төлөгдөөгүй байгаа аж.

Мөн арванхоёрдугаар сарын цалин олгогдоогүй байгааг эх сурвалж баталсан.

Т.Дагвадорж "Advantage" хөтөлбөрийн хүрээнд ажилчдын цалинг олон нийтэд харуулсан нь ч хууль бус үйлдэл. Ажилчидтайгаа нууц хадгалах гэрээ зурсан мөртлөө өөрсдөдөө "хөзөр" болгон ашиглах нь хувь хүний нууцад халдаж байгаа хэрэг юм. 

Тэрбээр энэ үеэр 21 хүний цалингийн задаргааг танилцуулсан. 

 

Төслийн мөнгийг зориулалтын бусаар ашиглах нь FIFA-гийн дүрэм зөрчсөн үйлдэл

 

Гэрэл зургийг MPA агентлагийн онцгой зөвшөөрөлтэйгөөр ашиглав

Холбооны генсек Т.Дагвадорж нь хэвлэлийн хурал дээрээ "Advantage" хөтөлбөрийн талаар ярьсан ч бусад төсөл, хөтөлбөрийн талаар огт дурдаагүй юм.

"Advantage" хөтөлбөр нь AFC-гээс гишүүн холбоондоо олгодог жил бүрийн санхүүжилтээс гадна нэмэлт санхүүжилт аж. Тодруулбал жилийн орлого нь $5 саяас хэтрээгүй тохиолдолд дээрх санхүүжилтийг өгдөг.  

Төсөл, хөтөлбөрийн мөнгийг зориулалтын бусаар ашиглах нь FIFA-гийн дүрэм зөрчсөн үйлдэл. 

Мөн дээрх төсөл, хөтөлбөр нь зөвхөн холбооны удирдлагуудын танилцуулсан санхүүгийн тайлан болон FIFA болон AFC-гийн нийтэд зарласан хөтөлбөрүүд гэдгийг тодотгоё. 

Үүнээс гадна Японы Хөлбөмбөгийн Холбоо (JFA)-ноос санхүүжүүлсэн төсөл гэх жижиг төсөл, хөтөлбөрүүд хэний "халаас" руу ордог нь нууц хэвээр.

Монголоо "мартсан" Монголжингоо  

 2023 оны долдугаар сарын 3-нд болсон хөлбөмбөгийн холбооны ээлжит их хурлаар холбооны тэргүүнээр М.Болд томилогдсон бол Ерөнхий нарийн бичгийн даргаар Т.Дагвадорж, Дэд нарийн бичгийн дарга, Гадаад харилцааны хэлтсийн дарга, Санхүүгийн албаны даргаар С.Монголжингоо нар томилогджээ.

Үл мэдэгдэх шалтгаанаар салхинд хийсдэг ноён долларын учрыг мэдэх хүмүүс бол дээрх гурав юм. 

Монголын Хөлбөмбөгийн холбооны дэд нарийн бичгийн дарга, Гадаад харилцааны хэлтсийн дарга, Санхүүгийн албаны дарга С.Монголжингоо нь нөгөө хоёроо бодвол холбоонд олон жил ажиллаж буй хүн.

Тэрбээр 2011 оноос хойш буюу авлигын хэргээр хөлбөмбөгийн ертөнцөөс хөөгдсөн Б.Ганболд агсныг Ерөнхийлөгчөөр ажиллаж байх үеэс холбоонд данстай болсон билээ. 

Тодруулбал ямар төсөл, хөтөлбөр яаж хэрэгжиж, хэдий хэмжээний мөнгө хэзээ орж ирдгийг мэддэг ганц хүн юм. 

Т.Дагвадорж нь хэвлэлийн хурал дээр хөлбөмбөгийн холбоог ₮3.8 тэрбумын өртэй гэж онцолсон. Үнэхээр ийм хэмжээний өрийг өмнөх удирдлагууд нь үлдээсэн бол тэднээс яагаад хохирлоо нэхэмжлэхгүй, өдийг хүртэл чимээгүй явааг гайхмаар. 

МХБХ-д өнөөдрийн байдлаар үндсэн 38 ажилтантай. Тэгвэл өнгөрсөн онд 30 гаруй хүн янз бүрийн шалтгаанаар ажлаас халагдсаны дотор зургаан нягтлан бий. 

Шигшээгийн тамирчдад "үнэтэй" бэлтгэлийн бааз

 

2023 оны дөрөвдүгээр сард МХБХ Төв аймгийн Зуунмод хотоос холгүй орших шигшээ багийн бэлтгэлийн баазыг ашиглалтад орсныг зарлаж байв. FIFA-гийн төслөөр санхүүжүүлсэн энэ байгууламжийн эзэмшигч нь холбоо. 

Уг нь өвлийн хахир цагт ч бэлтгэл хийх бүрэн боломжтой 

Харамсалтай нь шигшээгийнхэнд олдохгүй "үнэтэй" бараа болов. Уг баазад дөрвөн өдөр бэлтгэл хийсний төлөө ₮11 сая төгрөг нэхэмжилсэн баримт бий.

Гэхдээ хувийн байгууллага бус холбооныхон өөрсдөө эзэмшдэг мөртлөө төлбөр нэхэмжилж буй нь тун хачирхалтай.  

Тус газар нь тогтмол амрагчид авдаг болохыг фэйсбүүкийн 180,000 гишүүнтэй "Goy amraltiin gazruud haana baina" группт "Airdome tour" нэрээр ордог зараар нь мэдэж болно. 2023 оны зургаадугаар сараас хойш буюу бэлтгэлийн бааз ашиглалтад орсон цагаас амрагч хүлээн авч, ашиг олдог атлаа шигшээгийн тамирчдаас төлбөр нэхдэг. Өмнөх төлбөрөө өгөөгүй шалтгаанаар тамирчдыг хүлээн авахаас татгалзсан ч удаа бий.   

Тэгвэл холбооны Техникийн хэлтсийнхэн болон тамирчид өнөөдөр болох Зөвлөлийн ээлжит бус хурлын үеэр тэмцлийн дараагийн хэлбэрт шилжиж, эсэргүүцлийн тайван жагсаал хийхээр болжээ. 

Холбоо энэ удаагийн тэмцлийн үр дүнд шинэчлэгдэж чадах уу, ийм байдалд хүргэсэн хүмүүс нь хариуцлага хүлээх үү гэдгийг харах л үлдлээ.