Герман улс олон улсын аюулгүй байдлын асуудал дээр “нялхаараа” байгааг канцлерын зөвлөх хэлжээ

Герман улсын эрх баригчдыг Украины хямралын асуудалд шийдэмгий хариу арга хэмжээ авахгүй байгааг зарим улс орнууд шүүмжилдэг.

Тэгвэл канцлер Олаф Шольцын зөвлөх энэ тал дээр өөрийн байр суурийг өвөрмөц байдлаар тайлбарлажээ. Пүрэв гарагт Германы нийслэлд зохион байгуулагдсан Berlin Progressive Governance Summit чуулганы үеэр канцлерын тамгын газрын дарга Вольфганг Шмидт “Хүмүүс өнөөдөр биднийг манлайлахыг шахаж шаардаж байгаа нь Америкчуудын олон арван жилийн өмнөөс туулаад ирсэн бэрхшээл зовлон юм. Гэтэл бид энэ асуудлаар дөнгөж өсвөр насан дээрээ байна. Гадаад аюулгүй байдлын бодлого дээр бид насанд хүрэх болоогүй байна. Өсвөр насан дээрээ хүн дааврын илүүдэлтэй, заримдаа хэтрүүлдэг, өөртөө итгэлгүй, байр сууриа олоогүй байдаг шүү дээ” гэж ярьжээ.

Гэхдээ тэрбээр Герман улс Украины асуудал дээр хойрго хандаж буй гэсэн шүүмжийг энэ үеэр няцаасан байна.

“Зэр зэвсгийн тусламжийн хэмжээгээр Герман улс АНУ, Их Британийн дараа гуравт эрэмбэлэгдэж байна. Зарим хүмүүс Герман улсыг онцгойлон шүүмжилж байгааг би хүлээн зөвшөөрч чадахгүй. Энэ бол америкчууд, канадууд, британичууд, француудын хэн нь ч дангаар шийддэггүй, хамтдаа шийдэх асуудал. Өнөөдөр манайхаас өөр орчин үеийн байлдааны танкуудаа Украинд илгээсэн улс алга” гэж Шмидт өөрийн улсын бодлого, үйл ажиллагааг өмөөрсөн юм.

Дайны эхэн үед Украинд зэр зэвсгийн тусламж шууд үзүүлэхээс зайлсхийж байсан Шольцын засгийн газрын байр суурь сүүлд нэлээд өөрчлөгдөөд байгаа.

Мягмар гарагт Герман улсын амласан дөрвөн ширхэг "Iris-T" агаарын довтолгооноос хамгаалах системийн эхнийх нь Украинд хүрсэн юм.

Киевийн албаны эх сурвалж уг үйл явдлыг “агаарын довтолгооны хамгаалалтад шинэ эрин үе эхэллээ” хэмээн магтаж байв.

Зэр зэвсгийн тусламжаас гадна эрчим хүчний асуудал дээр Германы засгийн газрыг гаргасан эргэлзээтэй шийдвэрийг зарим улс орон шүүмжилж эхлээд байна.

Европын Холбоо даяар байгалийн хийн үнэ тарифт дээд хязгаар тогтоох төслийг эсэргүүцсэн Германы эрх баригчид саяхан дотоодын зах зээлдээ ийм хязгаар тогтоох шийдвэр гаргасан.

Польшийн ерөнхий сайд Матеуш Моравецки “Европын Холбооны хамгийн баян, хамгийн хүчирхэг улс хямралыг зөвхөн өөртөө ашигтайгаар эргүүлэх гэж оролдож байна. Энэ бол шударга бус явдал” гэж шүүмжилж байжээ.

Эх сурвалж: The Guardian