Норвеги улс газрын тос, байгалийн хийн үйлдвэрүүдээ зэвсэгт хүчний хамгаалалтад авчээ

Өнгөрсөн долоо хоногт Европын зах зээлд ОХУ-аас байгалийн хий нийлүүлдэг дамжуулах хоолойнууд хорлон сүйтгэх ажиллагааны улмаас дөрвөн хэсэгтээ задарсан нь тодорхой болсон билээ. Балтийн тэнгист байрладаг, Умард Урсгал 1 ба 2 хоолойнуудыг санаатай сүйтгэсэн хэрэгт Өрнөдийнхөн болон Оросын эрх баригчид харилцан нэгнээ буруутгаж байгаа.

Тэгвэл үүнээс сургамж авсан Норвеги улс өөрийн эзэмшлийн байгалийн хий, газрын тос боловсруулах үйлдвэрүүдэд зэвсэгт хүчний бие бүрэлдэхүүнийг илгээж, хамгаалалтдаа авсан байна.

Үүнийгээ болзошгүй халдлагаас урьдчилан сэргийлэх арга хэмжээ гэж Норвегийн эрх баригчид тайлбарлажээ.

Өнгөрсөн долоо хоногт тус улс далайд байрладаг олборлолтын байгууламжууддаа тэнгисийн болон агаарын зэвсэгт хүчний эргүүлүүдийг илгээж байжээ. Харин өчигдрөөс эх газар дахь байгалийн хий, газрын тос дамжуулах, боловсруулах байгууламжуудыг цэргийн хүчээр хамгаалуулж эхэлсэн байна.

НАТО-гийн гишүүн Норвеги улс нь Европ тивийн хамгийн том хий нийлүүлэгч, газрын тос экспортлогч юм.

Умард Европын "Хамтарсан Экспедицийн Хүч"-ний орнууд тэнгисийн гүн дэх дамжуулах хоолой, кабелуудын аюулгүй байдлыг хэрхэн хангах талаар уулзаж ярилцахаар болсныг Их Британийн батлан хамгаалахын сайд Бэн Уоллос өчигдөр мэдэгджээ.

Энэ бүлэгт Балтийн тэнгисийн сав газар болон Европын умард бүсийн 10 орон багтдаг юм.

Эх сурвалж: Reuters