Өндөр орлоготой иргэнд 20 хүртэл хувийн татвар ногдуулж, янжуур болон электрон тамхины татварыг нэмнэ
2023 оны төсвийн төсөлд татвартай холбоотой хэд хэдэн онцлог өөрчлөлт тусгагдсан байна.
Тухайлбал, татварын шаталсан тогтолцоог нэвтрүүлэх юм.
Өмнө нь орлогоос хамааран ялгаатай татвар ногдуулахаар төлөвлөж байсан ч иргэдийн эсэргүүцэлтэй тулж, буцаагдаж байв. Харин энэ удаад өөрчлөн боловсруулаад байна.
- 0-10 сая төгрөгийн орлоготой иргэд 10 хувь
- 10-15 сая төгрөгийн орлоготой иргэд 15 хувь
- 15-20 сая төгрөгийн орлоготой бол 20 хувийн татвар төлөх аж.
Манай улсад 817.2 мянган иргэн орлогын албан татвар төлж байгаагаас ердөө 1.3 мянга нь дээрх татварыг төлөх аж.
Тамхины татварыг үе шаттай нэмнэ
Манай улсад тамхины үнэ дунджаар 1.4 ам.доллар байна. Дэлхийн дундаж нь 4 ам.доллар байгааг Сангийн яамнаас танилцуулсан. Мөн Дэлхийн Эрүүл Мэндийн Байгууллагаас тамхины татварыг үе шаттайгаар нэмэгдүүлэхийг зөвлөснийг дурдав.
Иймд хоёр жилийн хугацаанд янжуур тамхины татварыг хоёр дахин, электрон тамхийг шингэн эсвэл халаадаг гэдгээс үл хамааран 20 хувийн татвартай болгож, цаашид нэмэх бодлого баримтлах аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
