Уншиж байна ...
ХУУЧИРСАН МЭДЭЭ: 2022/07/29-НД НИЙТЛЭГДСЭН

Агаарын цэргийн алба хаагчид "МиГ-29УБ" загварын сөнөөгч онгоцоор бие даасан анхны нислэгээ гүйцэтгэв

Г.Мөрөн, iKon.mn
2022 оны 7 сарын 29
iKon.MN
Зураг зураг

Монгол Улсын Зэвсэгт хүчний Агаарын цэргийн алба хаагчид "МиГ-29УБ" загварын сургууль, байлдааны сөнөөгч онгоцоор бие даасан анхны шалгах нислэгээ амжилттай гүйцэтгэлээ.

Тус үйл ажиллагаанд Зэвсэгт хүчний Агаарын цэргийн командлагч хурандаа Т.Ганбат, штабын дарга бригадын генерал Б.Эрдэнэбат, бэлтгэл хошууч генерал О.Энхбаяр болон албаны бусад хүмүүс, ахмад нисгэгчид оролцов.

МиГ-29УБ загварын сөнөөгч онгоцны нисгэгчид нь ОХУ-ын Краснодар хотын Нисэхийн их сургуулийг 2011 онд төгссөн юм. Энэ жил тэд тус Нисэхийн их сургуульд шилжин суралцаж, нисгэгчдийн ур чадвар, инженер техникийн ажилтнуудын онол, дадлагын сургалт бэлтгэлийг бүрэн хангаж, ийнхүү анх удаагаа МиГ-29УБ онгоцыг хөх тэнгэрт хөөргөжээ.

БНМАУ-ын Батлан хамгаалах яамны сайдын 1970 оны 9 дүгээр сарын 23-ны өдрийн тушаалаар МАА-ын анхны сөнөөгч онгоцны эскадрилийг байгуулах шийдвэр гарч, фронтын амдан сөнөөгч “МиГ-17”, “МиГ-15УТИ”, “МиГ-21ФПМ”, “МиГ-21УМ” нислэг үйлдэж байгаад 1993 оноос хойш Монголын хөх тэнгэрт сөнөөгч онгоцны дуу цуурайтаагүй юм.

Сургууль, байлдааны “МиГ-29УБ” сөнөөгч онгоцыг манай орны Зэвсэгт хүчин зэвсэглэлдээ авч, нислэг үйлдэж эхэлснээр улсын агаарын хилийн орон зайн аюулгүй байдлыг сахих, улсын болон цэргийн онц чухал объектыг агаарын болзошгүй халдлагаас халхлах, агаарын дайсныг алсын нөхцөлд устгах боломжтой юм.

 

Эх сурвалж “Соёмбо” сонин, ЗХЖШ