Өчигдөр болсон газрын дуудлага худалдаагаар 10 байршилд ялагч тодорч, нийслэлийн төсөвт 393 сая төгрөг төвлөрүүлэхээр болжээ

Жил бүр нийслэлийн тухайн жилийн газар зохион байгуулалтын төлөвлөгөөнд дуудлага худалдааны зарчмаар эзэмшүүлж, ашиглуулах газрын байршлыг тодорхойлон тусгахдаа газар зохион байгуулалтын ерөнхий төлөвлөгөө, Улаанбаатар хотын хөгжлийн ерөнхий төлөвлөгөө болон бусад бодлогын баримт бичгүүдтэй уялдуулан төлөвлөдөг.

Төлөвлөгөөний дагуу газар эзэмшүүлэх, ашиглуулах эрхийн дуудлага худалдааг Нийслэлийн газар зохион байгуулалтын албанаас Газрын биржийн цахим системийг ашиглан явуулдаг юм.

Энэ жилийн хувьд Нийслэлийн Засаг даргын 2022 оны А/28 дугаар захирамжийн дагуу 94 байршилд таван удаагийн дуудлага худалдаа зохион байгуулахаар төлөвлөсөн. Эхний ээлжийн дуудлага худалдаа гуравдугаар сарын 23-ны өдөр 19 байршилд болж нийслэлийн төсөвт 923.4 сая төгрөг төвлөрүүлэхээр болсон юм.

Хоёр дахь ээлжийн цахим дуудлага худалдаа өчигдөр буюу дөрөвдүгээр сарын 6-ны өдөр явагдлаа. Долоон дүүргийн 19 байршилд зохион байгуулснаас 15 байршилд 34 иргэн, хуулийн этгээдээс оролцох хүсэлт ирүүлсэн бөгөөд 10 байршилд ялагч тодрон нийслэлийн төсөвт 392.7 сая төгрөг төвлөрүүлэхээр боллоо.

Дараагийн дуудлага худалдаа дөрөвдүгээр сарын 27-ны өдөр явагдана. Оролцохыг хүссэн иргэн, аж ахуйн нэгжүүд Газрын биржийн цахим системийн mle.mn цахим хуудсанд хандах буюу 315712, 77771285, 80771285 утсанд холбогдон бүртгүүлж болно. Зарлагдаж байгаа байршлуудын дэлгэрэнгүй мэдээллийг land.ub.gov.mn холбоосноос авч болох юм.

Эх сурвалж: Нийслэлийн Газар зохион байгуулалтын алба