З.Батбаяр: Гадаргын ус бараг 50 километр куб хэмжээгээр багасжээ
Усны төлөө иргэдийн нэгдэл ТББ-ын тэргүүн З.Батбаяр болон Сэтгүүлч Батдорж сангийн Удирдах зөвлөлийн гишүүн Б.Ууганбаяр нар усны нөөц хэр хэмжээгээр багасаад байгаа талаар өнөөдөр мэдээллээ.
Усны төлөө иргэдийн нэгдэл ТББ-ын тэргүүн З.Батбаяр "Монгол Улсын усны нөөцийг өмнө нь 608 километр куб гэж тооцдог байсан. Харин БОАЖЯ-наас саяхан өгсөн мэдээллээр 564.8 километр куб болж багассан байна. Гол горхи ширгэж, мөсөн гол хайлснаар бараг 50 километр куб хэмжээгээр гадаргын ус багасжээ. Харин газрын доорх усны нөөц маань 10 километр куб. Тэгэхээр газрын доорх нийт уснаас тав дахин их хэмжээний ус сүүлийн 20-30 жилийн хугацаанд алга болоод байна" гэв.
Үргэлжлүүлэн тэрбээр "Улаанбаатар хотод 1980-аад оны үед хоногт ихдээ 220 мянга орчим метр куб усыг хэрэглэх боломжтой буюу дээд хязгаар нь гэж тогтоосон. Гэтэл өнөөдөр бид 230-240 мянган метр куб ус хэрэглэж байна. Монгол Улс усны нөөцийн хомсдолд орлоо гэдгээ дэлхий нийтэд зарлах цаг нь болжээ. Зоригтойгоор хэлье, бид унд, ахуйн усан хангамжийн асуудлаар аюултай түвшинд иржээ" гэсэн юм.
Түүний хэлснээр усны нөөцийн хомсдолоос гарах гурван үндсэн арга байдаг аж. Эдгээр нь
- Усаа хэмнэх
- Усыг дахин ашиглах
- Усны нөөцийн хуримтлалыг бий болгох юм.
Усны төлөө иргэдийн нэгдэл ТББ-ын тэргүүн З.Батбаяр "Иргэд усаа хэмнэж харьцангуй сурсан. Гэвч энэ арга нь 5-10 хувийн хэмнэлтийг л авчирдаг. Харин усыг дахин ашиглалтын тухайд нийслэлчүүдийн хоногийн усны хэрэглээний 20-30 хувийг дахин ашиглаж байгаа.
Дээрх хоёр арга нь хомсдлыг бууруулж чадахгүй тул усны хомсдлыг арилгах үндсэн арга нь нөөцийг хуримтлуулах юм.
Туул гол 2000-аад оны эхнээс бараг жил бүр тодорхой хугацаанд тасалдаж байна. Тасалдаад буй шалтгаан нь өвлийн цагт бид газрын доорх усыг нь "ховх сордог". Боломжит хэмжээнээсээ илүүг ашиглаад байгаа учраас Туул гол усаа нөхөж чадахгүй, тасалдаж байна. Иймд Туул гол дээр далан боомт барьж усаа хуримтлуулж, урсцыг нь тогтмол хэмжээнд байлгаж чадвал газрын доорх ус эргээд нөхөн сэргээгдэнэ" гэлээ.
ВИДЕО:
Мэдээллийг Үндэсний мэдээллийн төвийн шууд дамжуулалтаас бэлтгэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
36 СЭТГЭГДЭЛТЭЙ
|
