Уншиж байна ...
Зураг
Зураг
ХУУЧИРСАН МЭДЭЭ: 2022/01/14-НД НИЙТЛЭГДСЭН

Ц.Билэгтсайхан: Омикрон голомтлон гарч буй кластер халдварыг цааш тархаахгүй барих чиглэл рүү орно

Г.Өлзийхутаг, iKon.mn
2022 оны 1 сарын 14
iKon.MN
Зураг зураг
Гэрэл зургийг Mpa.mn

Коронавирусийн Омикрон хувилбар дотоодод бүртгэгдсэнтэй холбоотойгоор эрсдэлийн үнэлгээг хийжээ.

"Маш өндөр эрсдэлтэй гэсэн эрсдэлийн үнэлгээний дүн гарлаа"

Энэ тухай ХӨСҮТ-ийн ерөнхий захирал Ц.Билэгтсайхан "Бид хоёр хоногийн өмнө салбар хоорондын 27 дахь эрсдэлийн үнэлгээг хийсэн. Үүнд 15 байгууллага оролцсон бөгөөд нийт магадлалын 19, үр дагаврын 20 шалгуураар үнэлсэн.

Ингэхэд магадлалын 18 тийм, үр дагаврын шалгуураас 16-д тийм гэж гарсан. Өөрөөр хэлбэл, маш өндөр эрсдэлтэй гэсэн үнэлгээний дүн гарлаа.

Энэ үнэлгээг үндэслэн бид цаашид хэрэгжүүлэх хариу арга хэмжээгээ салбар, чиглэл бүрээрээ тодорхойлон гаргана" гэв.

"Халдварын эсрэг авч хэрэгжүүлэх хариу арга хэмжээгээ өөрчилж байна"

Мөн тэрбээр "Коронавируст халдварын тохиолдол өдөр ирэх тусам нэмэгдэж байна. Дотоодод Омикрон хувилбар оношлогдож байгаа тул бид хариу арга хэмжээгээ өөрчилж байна.

Өмнө нь бид эрсдэлд суурилсан буюу хилийн тандалтын хариу арга хэмжээг түлхүү авч хэрэгжүүлж байсан.

Харин одоо

  1. Тандалт, сэргийлэлтийн чиглэлийн хариу арга хэмжээнүүд,
  2. Дархлаа сэргээх нэмэлт тун буюу коронавирусийн эсрэг вакцины 3, 4 дүгээр тунгийн хамралтын нэмэгдүүлэх,
  3. Нийтийн эрүүл мэндийн хариу арга хэмжээ,
  4. Хилийн тандалт, эрсдэлд суурилсан хариу арга хэмжээ гэсэн дараалалтай болгон өөрчиллөө.

Эрүүл мэндийн яам, УОК, Засгийн газрын хуралдаанаас гаргасан тушаал шийдвэрийн дагуу бид хилийн тандалт болон тусгаарлан ажиглах байранд тандах үйл ажиллагааг зогсоосон.

Иймд дотоодын халдвар, тэр дундаа эрсдэлд бүлгийн хүн амыг хамгаалах, голомтлон тархаж байгаа кластер халдварыг цааш тархаахгүйгээр барих чиглэл рүү илүү орж байна.

Омикрон хувилбарын нууц үеийн хугацаа илүү богиносож байна. Мөн халдварлуулах үе, халдвартай байх үе буурч байгаа тул өвдөх эрсдэлтэй бүлгүүдээ шинээр тодорхойлж, сэжигтэй тохиолдол, хавьтлын тодорхойлолт, хөл хорион байх хугацаа, дахин халдвар авах тодорхойлолтуудыг шинэчилж байна" гэсэн юм.

ВИДЕО:

https://www.facebook.com/iKonNews/videos/420473176493872