Өнжмөл шар өвс шатаахгүй байхыг зөвлөв
Нийслэлийн ногоон бүсэд хуурайшилт их байгааг Цаг уур орчны шинжилгээний газраас мэдээллээ.
Өнгөрсөн онд нийслэлийн хэмжээнд шар өвсний гал түймрийн 48 тохиолдлоор 62.7 га талбай шатаж иргэдийн өмч хөрөнгө, байгаль экологид хохирол учирсан байна.
Ногоон бүсийн хуурайшилт нь болзошгүй ой, хээрийн түймэр болон шар өвсний гал түймрийн аюул, эрсдэлийг нэмэгдүүлдэг. Иймд нийслэлийн ногоон бүсэд зорчиж буй иргэд, зуслангийн чиглэлд оршин сууж буй айл өрхүүд цогтой үнс нурмаа тагтай төмөр саванд хийж хэвших, тамхи, чүдэнз, ил галыг бүрэн унтраан, айл өрхүүд хашааны шар өвс, хог хаягдлыг ил задгай шатаахгүй байхыг нийслэлийн Онцгой байдлын газраас зөвлөж байна.
Мэргэжлийн байгууллагаас өгч байгаа зөвлөмжийг хэрэгжүүлж, эрүүл мэнд, амь нас, өмч хөрөнгөө гал түймрийн аюулаас урьдчилан сэргийлээрэй.
Ой, хээрийн түймрийн үед авах арга хэмжээ:
- Мэдээллийг цаг алдалгүй авч, гамшгаас хамгаалах төлөвлөгөөний дагуу ажиллах, шаардлагатай бол орон гэрээ орхиж, өөрсдийгөө аврах,
- Аюул тулгарсан үед түр хоргодох байр, ухсан нүх, том саванд орж амиа хамгаалах,
- Хоргодох байр байхгүй тохиолдолд галд тэсвэртэй галаас хамгаалах зориулалт бүхий бүтээлэг ашиглах,
- Хугацаа байгаа бол гэр, байшин, бусад байгууламжийг хамгаалах алхмуудыг хийнэ. Галаас хамгаалах зурвас татна.
Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
