Х.Нямбаатар: Үндэсний урлагийн их театрын шинэ барилгыг барих Хятадын засгийн газрын буцалтгүй тусламжийн мөнгө батлагдсан. Газраа сонгоно

Хан-Уул дүүргийн 26 дугаар хороо, Үндэсний цэцэрлэгт хүрээлэнгийн урд хэсэгт нийслэлийн хэвтээ болон босоо тэнхлэгийн хурдны замын угталцах хэсэгт Үндэсний урлагийн их театр, Цэнгэлдэх хүрээлэнгийн шинэ барилгыг барих газрыг сонгохоор болжээ.

Хотын дарга Х.Нямбаатарын мэдээлснээр Үндэсний урлагийн их театрын барилгыг барих зураг төсөл болон Хятадын засгийн газрын буцалтгүй тусламжийн мөнгө нь батлагджээ.

Одоо геологийн хайгуул болон холболтын зургийг батлуулснаар барилгын бүтээн байгуулалтын ажил эхлэх аж. 

Үндэсний урлагийн их театрын шинэ барилгыг 800 орчим хүний суудал бүхий найрал хөгжмийн тоглолтын танхим, 1,500 хүний суудал бүхий дуулалт жүжиг, бүжгэн жүжгийн тоглолтын танхим, 2,500 орчим хүний суудалтай бүх төрлийн тоглолт, үйл ажиллагаа зохион байгуулах танхимтай байхаар төлөвлөжээ.

Сүхбаатар дүүргийн нэгдүгээр хорооны нутаг дэвсгэр, Үндэсний урлагийн их театр байрлаж буй барилга 1950 онд баригдсан бөгөөд Хүүхэлдэйн театр, Драмын театр үйл ажиллагаа явуулдаг билээ. Шинэ барилгатай болсноор Үндэсний урлагийн их театр "тусдаа" гарах юм байна.