Мансууруулах бодис хэрэглэсэн хүний нүүр царайд орох өөрчлөлтийг харуулдаг төхөөрөмжийг дүүргүүдийн цагдаагийн хэлтэст хүлээлгэж өглөө
Хар тамхитай тэмцэх газраас мансууруулах бодис хэрэглэсэн хүний нүүр царайд орох өөрчлөлтийг харуулдаг төхөөрөмжийг дүүргүүдийн цагдаагийн хэлтэст хүлээлгэн өглөө.
Сүүлийн жилүүдэд манай улсад мансууруулах бодистой холбоотой зөрчил эрс нэмэгдэж байна. Ийм төрлийн гэмт хэрэгт холбогчдын 91.2 хувь нь 13 - 35 насны залуучууд эзэлж байгаа нь Монгол Улсын үндэсний аюулгүй байдал, хүн амын удмын санд сөргөөр нөлөөлж болзошгүйг Цагдаагийн Ерөнхий Газар (ЦЕГ)-ын Хар тамхитай тэмцэх газрын дарга, цагдаагийн хурандаа П.Сандагсүрэн онцоллоо.
Тиймээс энэ төрлийн гэмт хэрэгтэй тэмцэх, урьдчилан сэргийлэх ажлыг эрчимжүүлэх зорилгоор хар тамхины хор уршгийг дэвшилтэд технологи ашиглан илрүүлэх, иргэд олон нийтэд сурталчлан таниулах зорилгоор Нийслэлийн долоон дүүргийн Гэмт хэргээс урьдчилан сэргийлэх ажлыг зохицуулах салбар зөвлөлд мансууруулах бодис хэрэглэсэн хүний нүүр царайд гарах өөрчлөлтийг таниулах төхөөрөмжийг хүлээлгэн өгч байгаа аж.
Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлийн зүгээс мансууруулах бодис хэрэглэсэн хүний царайд орох өөрчлөлтийг таних зорилготой 10 төхөөрөмжийг дүүргүүдийн цагдаагийн хэлтэст худалдан авах ажлыг зохион байгуулжээ.
Уг төхөөрөмжийг БНХАУ-ын Өвөрмонголын Ордос хотод амжилттай туршиж, хэрэгжүүлсэн болохыг албаныхан онцолсон. Уг төхөөрөмжид өөрийн зургийг оруулснаар хар тамхи хэрэглэснээс хойш 1-6 жилийн дараа нүүр царайд ямар өөрчлөлт орохыг харуулах юм.
2024 онд хар тамхитай холбоотой гэмт хэргийн тоо өмнөх оныхоос 6.4 хувиар өссөн. Мөн зөрчил 65 хувиар нэмэгдсэн. Тиймээс Хар тамхитай тэмцэх газраас нийлүүлэлтийг таслан зогсоох зорилгоор үе шаттай арга хэмжээ авч байгаа боловч үр дүнд хүрэхгүй байгааг албаныхан ярьж байв. Тодруулбал Афганистан, Турк, Казахстан болон Зүүн Азийн орнуудаас манай улс руу нийлүүлэлт их байгаатай холбоотой аж.
Тиймээс нийлүүлэлтийг таслан зогсоохын хажуугаар урьдчилан сэргийлэх ажлыг явуулах нь чухал байгаа юм. Тиймээс сүүлийн гурван жил дараалан сургалт, нөлөөллийн ажлыг тасралтгүй зохион байгуулж буй.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
25 СЭТГЭГДЭЛТЭЙ
|
