"Дампуурлын ирмэгт тулсан барилгын 100 гаруй компанийн асуудлыг шийдэж өгөхгүй бол тэмцлийн дараагийн арга хэмжээг авна"

Гэрэл зургийг mpa.mn

Монгол Улсын 21 аймаг, есөн дүүрэгт улсын төсвийн хөрөнгөөр сургууль, цэцэрлэг, эмнэлгийн барилга барьж буй компаниуд дахин хэвлэлийн хурал хийлээ.

Тэд аравдугаар сарын 11-нд хэвлэлийн хурал хийхдээ "Үнийн бодит өсөлтийн индексийг тооцож, төсвийн зөрүүг 2022 оны төсвийн тухай хуульд тусгах, төрийн болон төрийн бус байгууллагын төлөөлөл, аж ахуйн нэгжээс бүрдсэн ажлын хэсэг байгуулах, 2021 оноос өмнөх барилгын ажлуудад үнийн өсөлтийн зөрүүг тооцож, 2022 оны төсөвт суулгах" зэрэг нийт таван шаардлагыг төрийн гурван өндөрлөг болон УИХ-ын гишүүдэд хүргүүлж байв. 

Энэ дагуу Ажлын хэсэг байгуулагдаж, тухайн компаниудын төлөөллийг хүлээн авч уулзсан ч одоогоор ямар нэг үр дүн гараагүй бөгөөд цаашид хэрхэх нь тодорхойгүй байгаа тул барилгын компаниуд дахин мэдээлэл хийж буй нь энэ юм.

"Сангийн сайд барилгын материалын үнийн өсөлтийг наймдугаар сард түр зуурынх гэж байв. Гэтэл тав, зургаадугаар сар үргэлжилж, нийгэмд хор уршиг нь гарч, компаниуд дампуурахдаа тулсан байхад  түр зуур гэдэг үгээр хааж байгаа нь харамсалтай байна. Сангийн сайд Б.Жавхлангийн хувьд энэ жил анхны төсвөө өргөн барьж байна. Гэтэл Засгийн газрын гишүүддээ буруу мэдээлэл өгч, хэсэг бүлэг салбарын асуудлыг хөлдөө чирч, дампуурахад хүргэж байгаа тул барилгачид бид дараагийн арга хэмжээнд орно. Өнөө, маргаашдаа харна" хэмээн барилгын компаниудын төлөөлөл хэллээ.

Бид хуулийн дагуу авах ёстой мөнгөө л авъя гэж байгаа юм. Дэлхий нийтийг хамарсан цар тахал, тээвэр ложистикийн асуудал, төмрийн хүдэр зэргээс шалтгаалж материалын үнэ өсөөд байгаа. Энэ өсөлтийг Төсвийн хууль, Худалдан авах ажиллагааны хуульд ч бий гэлээ. 

Мөн "Өнөөдөр дампуурлын ирмэгт байгаа 100 гаруй компанийн асуудал болох 60 тэрбумыг шийдэж өгөх шаардлагатай байна. Бид Засгийн газрын ордны баруун хаалганд өлсгөлөн зарлана" гэсэн юм.