С.Энхболд: Халдвар өргөн хүрээнд тархсан үед толгой дараалан шинжилгээ хийдэггүй. Эмчилгээ, тандалтдаа анхаардаг

Гэрэл зургийг mpa.mn

Эрүүл мэндийн салбарт үүсээд буй ачаалал, хүний нөөцийн талаар Эрүүл мэндийн сайд С.Энхболд сэтгүүлчдийн асуултад хариуллаа.

-Эрүүл мэндийн салбар хүний нөөцийн хомсдолд орж байгаа. Гэтэл 500 гаруй эмч, ажилтан ажлаасаа гарсан тухай мэдээлэл байна. Үүний шалтгаанд дүгнэлт хийж үзсэн үү?

-Зөвхөн КОВИД-19 цар тахлын үед биш, энгийн үед ч шилжилт хөдөлгөөн хийгдсээр байдаг. Нийт ажилтны тав орчим хувьд явдаг.

Манай салбарт нийт 56,000 гаруй ажилтан бий. 36,000 гаруй нь төрийн өмчийн эмнэлэгт ажиллаж байгаа. Маш их ачаалалтай байгаа ч хүний амь насыг аврахын төлөө эмч, ажилтнууд маань ажилласаар байна.

Энэ салбарын хүний нөөцийг тийм ч амархан бэлдээд гаргачихдаггүй. Зургаан жил сураад, хоёр жил дадлагаждаг. Бид эмч нарын ачааллыг бууруулж, зохион байгуулахын тулд резидент буюу дадлагажигч эмч нараа дайчлан ажиллаж байгаа.

-Гэртээ нас барж байгаа тохиолдол байгаа гэж байгаа ч Эрүүл мэндийн яам мэдээлэхгүй байна. Харин түргэний эмч нар зарим дуудлагадаа очиж чадахгүй байгаа учир гэртээ нас барж байгаа тохиолдол байгааг өөрсдөө хэлж байна шүү дээ?

-Гэртээ нас барж байгаа тохиолдол бий. Эрүүл мэндийн яамнаас уг мэдээллийг нуугаагүй. 5-6 мянган хүн нас барсан тухай зарим хүн хэлсэн, тийм зүйл байхгүй. Бодит тоо нь 1,173. Нас баралтыг судлах баг тусдаа ажиллаж байгаа.

Иргэдэд эрүүл мэндийн үйлчилгээг хүргэх, амь насыг аврахын төлөө хичээн ажиллаж байгаа.

-Шинжилгээний цэг хүрэлцэхгүй байгаа учраас тохиолдол илрэх нь бага байгаа юм биш үү. Шинжилгээ өгөх мөнгө байхгүй учир өөрийгөө өвчилснийг мэдэхгүй яваа хүн их бий байх?

-ДЭМБ-ын зөвлөмж бий.

Халдвар өргөн хүрээнд тархсан үед толгой дараалан шинжилгээ хийдэггүй. Харин тусламж үйлчилгээ, тандалтаа сайжруулахад анхаарах ёстой.

Дельта хувилбар нь альфаг бодвол тархалт ихтэй. Одоо оргил үедээ явж байна. Иймд эмчилгээ үйлчилгээ, тандалтдаа анхааран ажиллаж байна.

ВИДЕО: