Ё.Жаргалсайхан: “Эрдэнэт үйлдвэр" ТӨҮГ-ийн бүтээн байгуулалтын тоног төхөөрөмжийг дөрвөн өдөрт багтаан татаж авна
Замын-Үүд дэх автотээврийн зохицуулалтын талаар Зам, тээврийн хөгжлийн яамны Автотээврийн бодлогын хэрэгжилтийг зохицуулах газар, Автотээврийн үндэсний төв ТӨҮГ-аас мэдээлэл хийлээ.
ЗТХЯ-ны Авто тээврийн бодлогын хэрэгжилтийг зохицуулах газрын дарга Ё.Жаргалсайхан “Хятадын талд нөхөл байдлыг тайлбарлах, тээвэр зохион байгуулахад олон арга хэмжээ авч ажиллаж байгаа. Хүндрэлтэй асуудал нь дотоодод халдвар нэмэгдэж байгаа тул хятадын талд орох вий хэмээгээд хязгаарлалтуудыг авсан явдал.
Үүнтэй холбогдуулаад тээврийг нэмэгдүүлэх тал дээр ажил зохион байгуулж байна. Өвөлжилтийн бэлтгэл ажил, том бүтээн байгуулалтын ажилтай холбоотойгоор дөрвөн чиглэлийн ачаа бараанд онцгой анхаарах шаардлагатай гэж үзэн УОК-оос шийдвэр гаргасан.
Тодруулбал, боомтод бөөгнөрсөн ачааны хажуугаар бүтээн байгуулалтын бараа бүтээгдэхүүнийг татаж авах шаардлага гарсан. Эрдэнэт үйлдвэрийн бүтээн байгуулалтын ажилд зориулагдсан 100 гаруй машин тоног төхөөрөмжийг татаж авах шаардлага гарсан тул тусгайлсан арга хэмжээ авч дөрвөн өдөрт багтаан татан авах шийдвэр гарсан. Өдөрт бараа ачихаар хил нэвтэрч буй 100-120 орчим автомашины 45 нь Эрдэнэт үйлдвэрийн бараа бүтээгдэхүүнийг татна гэсэн үг.
Бүтээн байгуулалтын ажилтай холбоотой татан авалт хийх зорилгоор тээвэр зохион байгуулалтын арга хэмжээ авч буй та бүхэн зөвөөр ойлгохыг хүсье.
Эрдэнэт үйлдвэрийн бүтээн байгуулалтаас гадна авто зам, газрын тосны үйлдвэр, ДЦС нь өвөлжилтийн бэлтгэл ажилтай холбоотойгоор тоног төхөөрөмжөө татан зайлшгүй ажил явагдаж байгаа. Үүнтэй холбоотойгоор тухай бүрд нь зохицуулалт хийн татан авна” гэв.
