Могод суманд хурдан морины үсэргээ үзсэн иргэн өмнө нь өгсөн шинжилгээний хариугаа засаж, замын постуудад үзүүлсэн байжээ

Монгол Улсын Шадар сайд С.Амарсайхан өчигдөр буюу гуравдугаар сарын 23-нд Мэргэжлийн хяналтын ерөнхий газарт ажиллажээ. Тэрбээр аймгуудын мэргэжлийн хяналтын байгууллагын ажилтнуудтай цахимаар холбогдож үүрэг, чиглэл өгсөн байна.

Цахим уулзалтын үеэр Шадар сайд Булган аймгийн мэргэжлийн хяналтын газрын ажилтнуудтай холбогдон Могод суманд зохион байгуулсан хурдан морины уралдааны талаар тодруулжээ. Хурдан морины уралдаан үзэхээр Улаанбаатар хотоос очсон гурван хүний нэг нь коронавирусийн халдвартай нь батлагдан тус суманд хөл хорио тогтоогоод байгаа билээ.

Булган аймгийн мэргэжлийн хяналтын газраас “Могод суманд аймгийн Засаг даргын захирамжийг зөрчиж, үсэргээ зохион байгуулсан. Аймгийн онцгой комиссоос холбогдох хүмүүст хариуцлага тооцох шийдвэр гаргасан. Хоёрдугаар сарын 6-наас тавдугаар сарын 1-н хүртэлх хугацаанд морин уралдаан зохион байгуулахыг хориглосон Засаг даргын захирамж бий. Уяачдын холбоо, Могод сумын Засаг дарга уг захирамжийг зөрчсөн. Тухайн суманд ажлын хэсэг ажиллаж байгаа.

Гуравдугаар сарын 21-ний 07:00 цагийн үед Могод суманд халдвартай хүн ирсэн. Тухайн иргэн 19-ний өдөр PCR шинжилгээ өгөөд, хариу нь гараагүй байхад энд ирсэн. 14-ний өдөр өгсөн шинжилгээний хариугаа гар утсан дээрээ засаад, замын постуудад үзүүлсэн хариуцлагагүй явдал болсон.

Түүний ойрын хавьтлуудыг тогтоож тусгаарлаад, Баасан гарагт PCR шинжилгээ хийхээр бэлдэж байна" гэдэг мэдээлэл өгчээ.