Коронавирусийн эсрэг вакцинд хамрагдсан хүний тоо 200 мянгыг давлаа
Нийслэлд КОВИД-19 халдварын эсрэг вакцины эхний тунг хийлгэсэн хүний тоо 200 мянгыг давлаа.
Гуравдугаар сарын 20-ны өдрийн 20:00 цагийн байдлаар 14,071 хүнийг вакцинд хамруулж, нийт 204,129 иргэн вакцины эхний тунг тариулжээ. Энэ нь нийслэл Улаанбаатар хотын насанд хүрсэн таван хүн тутмын нэг нь вакцинд хамрагдсан гэсэн үг юм.
Одоогийн байдлаар "Энэтхэг улсад үйлдвэрлэсэн 75 мянган хүн тун АстраЗенека вакцин, Солонгос улсад үйлдвэрлэсэн 7,200 хүн тун АстраЗенека вакцинууд дууссан. Синофармын вакцины 150 мянган хүн тунгаас 107,769 хүн тун одоогоор хийгдээд байна" гэдгийг ЭМЯ-ны хэлтсийн дарга Г.Болдмаа өчигдөр хэлсэн.
Харин вакцины татан авалт, цаашдын төлөвлөлтийн талаар Засгийн газрын Хэвлэл мэдээлэлтэй харилцах газрын дарга Ц.Ганзориг "Дөрөвдүгээр сараас вакцин татан авалт, хоёр дахь тунтай холбоотой өдөрт 30 мянгаас доошгүй хүнийг вакцинд хамруулна.
Халдварын голомтууд идэвхтэй буй Улаанбаатар хотын хүн амыг вакцинд хамруулах хугацаа тавдугаар сарын дунд үе гэж төлөвлөсөн. Үүний дараагаар орон нутагт дархлаажуулалтын ажил өргөн хүрээнд өрнөнө" хэмээн мэдээлээд байна.
