Д.Энхбат: Өөрсдийн толгойг ашиглахгүй гэдэг тэнэглэлийн орой

Ч.Болортуяа

2020 оны 8 сарын 28

iKon.MN

Гэрэл зургийг Б.Бямба-Очир /mpa.mn/

Нийт ерөнхий боловсролын сургуулийн 10 хувийг Кембрижийн хөтөлбөр, стандарттай болгох УИХ-ын зарим гишүүний зорилтын хүрээнд өрнөж буй боловсролын салбарын тухай хэлэлцүүлэгт УИХ-ын гишүүн асан Д.Энхбатын твиттер эшлэлүүдийг хүргэж байна.

Хэрэв бидэнд маш бага мөнгө бгаа бол МУБИС-ийг бүрэн шинэчилж хөгжүүлэх буюу шинэ үеийн багш нарыг бэлтгэхэд л зарцуулах хэрэгтэй. Шинэ үеийн багш нарыг бэлтгэх, амьдралын түвшинг нь дээш татах. Хувийн сургуульд хувьсах зардлыг хасах. Шинэ хотхонд заавал сургууль, цэцэрлэг барьдаг болгох. Улстөрчид, бусдын хийх ажил бол тэр. Харин сургуулиа, сургалтаа яаж хөгжүүлэхээ тэр шинэ үеийн багш нар мэдэг.
Бүх улс орон өөрийн үндэсний хөтөлбөртэй. АНУ ч National core хөтөлбөртэй. Харин өөрийн нүүр царайгүй, бусдыг харанхуй хуулах нь аюултай, 100% хууллаа ч амжилтад хүрэх боломж маш бага. Өөрсдийн толгойг ашиглахгүй гэдэг нь харин тэнэглэлийн орой.
Боловсролыг Кембрижийн, Кембрижийн биш гэж ярих нь ямар ч утгагүй яриа. Монголын үндэсний боловсролын хөтөлбөр л гэж байх ёстой. Тэр хөтөлбөр нь цаг үеийнхээ практик стандартыг хангана. Яахаараа заавал Кембриж гэж нэр өгч хайрцаглах ёстой юм бол?
Боловсрол бол зөвхөн хичээл, номын тухай яриа биш. Тэр тусмаа, барууны их сургуульд яаж тэнцэх тухай биш. Боловсрол бол монгол хүн яаж энэ дэлхийд өрсөлдөж амьдрах чадвартай болох тухай яриа. Хичээл, сургууль бол маш чухал. Гэсэн ч тэр бол эцсийн зорилго биш, харин хэрэгжүүлэх зам юм.
Яагаад зөвхөн Кембриж гэж? Яагаад түүнээс сайн улс орнуудыг бид судлахгүйгээр асуудлыг хаах гэж? Тэгээд ч Англи бол боловсролын тогтолцоо нь сайн гэхэд хэцүү л орон.
Ялангуяа Скандинавын боловсролыг гүнзгий судлах хэрэгтэй байгаа юм. Хэлбэрийг дууриах бус мөн чанарыг ойлгож үндэсний хөтөлбөрөө боловсруулах нь бидний зорилго. Үндэстэн бүр өөрийн үндэс болсон онцлог соёлтой байдаг. Түүн дээрээ тулгуурласан боловсрол л хүчтэй, тогтвортой хөгждөг.

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!