Тарваганы тулмыг Эмээлтээр оруулахыг завдсан иргэнд 2.9 сая төгрөгийн торгууль ногдуулжээ

Т.Саран, iKon.mn

2020 оны 8 сарын 19

iKon.MN

эх сурвалж: НМХГ

Эмээлт Авто тээврийн шалган нэвтрүүлэх товчоогоор 2020 оны наймдугаар сарын 15-ны өдөр Төв аймгийн Лүн сумаас Улаанбаатар хот руу зорчиж явсан тээврийн хэрэгсэлд үзлэг шалгалт хийх үеэр иргэн "Т"-гийн ачаанаас ахуйн зориулалтаар агнахыг хориглосон амьтан болох есөн бодгаль тарвага тээвэрлэж явсан зөрчлийг илрүүлэн, ЗООНОЗ өвчин судлалын төвд хүргүүлж, Зөрчлийн тухай хуулийн холбогдох арга хэмжээг авч ажиллажээ.

Монгол Улсын Их Хурлаас 2020 оны 01 дүгээр сарын 10- ний өдөр баталсан Зөрчлийн тухай хуулийн нэмэлт өөрчлөлтөөр: "Амьтны тухай хууль зөрчсөн бол 7.6 дугаар зүйлийн 4 дэх хэсэгт Агнуурын бүс нутгаас бусад газарт, эсхүл амьтныг агнах хориотой үед, эсхүл хориглосон хугацаанд, эсхүл хориглосон арга хэрэгслээр амьтныг барьсан, агнасан, тээвэрлэсэн бол зөрчил үйлдэхэд ашигласан эд зүйл, хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг гурван зуун нэгжтэй тэнцэх хэмжээний төгрөгөөр, хуулийн этгээдийг гурван мянган нэгжтэй хэмжээний төгрөгөөр торгоно" гэх заалт бий.

Уг заалтыг үндэслэн холбогдогч иргэн "Т"-д торгууль 300.000 төгрөг болон амьтдын Экологи-Эдийн-Засгийн үнэлгээгээр 2,592,000 төгрөг нийт 2.892.000 төгрөгийн торгууль ногдууллаа.

Иймд жолооч нар хүний дайвар ачааг тээвэрлэхдээ ачааг задлуулж үзэж хууль бус зүйл тээвэрлэж өөрсдөө хохирохгүй байхыг анхааруулж байна.

эх сурвалж: НМХГ

Эх сурвалж: Нийслэлийн мэргэжлийн хяналтын газар

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!