Төрийн ордны гадна Төрийн тугийг цэнгүүлнэ

Гэрэл зургийг mpa.mn 2019.07.11

Төрийн есөн хөлт цагаан тугийг цэнгүүлэх ёслол өнөөдөр буюу долдугаар сарын 9-ний 11:40 цагт Төрийн ордны гадна болох гэж байна.

Уг арга хэмжээ Үндэсний баяр наадмын хөтөлбөрийн хүрээнд Монгол Улсын Ерөнхийлөгчийн зарлигаар анх удаа зохион байгуулагдах гэж байгаа юм. Ерөнхийлөгч Х.Баттулга Төрийн тугийг цэнгүүлэх тухай зарлигийг энэ оны зургаадугаар сарын 26-нд гаргасан байна. 

Ингэхдээ Төрийн ёслолын журам батлах тухай 2015 оны Ерөнхийлөгчийн зарлиг болон Монгол Улсын Төрийг тугийг хүндэтгэн залах журмыг баримтлан зарлигаа гаргажээ. 

Төрийн ёслолын журам батлах тухай Ерөнхийлөгчийн зарлигт: 

8. Төрийн тугийг хүндэтгэн дээдлэх

• 8.1. Төрийн бэлгэ тэмдгийн тухай хуульд заасны дагуу Төрийн Их цагаан тугийг хүндэтгэн дээдлэнэ.
• 8.2. Төрийн Их цагаан туг нь Чингис хааны байгуулсан тулгар төрийн бэлгэдэл бөгөөд Монгол улсад нэг л байна. Харин аймгийн төвүүдэд төрийн эртний уламжлалын дагуу элч тугийг залж болно.
• 8.3. Төрийн туг нь Төрийн ордны Төрийн ёслол хүндэтгэлийн Их танхимд байрлах бөгөөд энэ танхимд зөвхөн Монгол Улсын Ерөнхийлөгч, Улсын Их Хурлын дарга, Ерөнхий сайд ёслолын ажиллагаа зохион байгуулж болно.
• 8.4. Төрийн туг залах ёслолыг “Төрийн тугийг хүндэтгэн залах журам батлах тухай“ Монгол Улсын Ерөнхийлөгчийн 1994 оны 67 дугаар зарлигийн дагуу зохион байгуулна.
• 8.5. Төрийн туганд иргэд, байгууллага хүндэтгэл үзүүлэх ажиллагааг Төрийн ёслолын алба зохицуулан зохион байгуулна хэмээн заасан байдаг. 

Мөн Монгол Улсын Төрийг тугийг хүндэтгэн залах журамд энэхүү ёслолын дэгийг нарийвчлан заасан байдаг ажээ.