Долларын ханш тогтворжсон гэв
Монгол Улсын төлбөрийн тэнцэл 2019 оны наймдугаар сарын байдлаар 39 сая ам.долларын ашигтай гарлаа. Энэ нь өнгөрсөн оны мөн үеэс 430 сая ам.доллараар өссөн үзүүлэлт юм. Мөн гадаад худалдааны тэнцэл 1.3 тэрбум ам.долларын ашигтай байна.
Монголбанкнаас зарласан төгрөгийн ам.доллартай харьцах ханш оны эхнээс 40.66 төгрөгөөр (1.5%), долоо хоногийн эхнээс 5.32 төгрөгөөр (0.2%) тус тус суларч, 2019 оны аравдугаар сарын 22-ны байдлаар 2,684.35 төгрөгт хүрлээ.
Бусад голлох валютуудын ханшийн ам.долларын эсрэг өөрчлөлтийг авч үзэхэд, евро 3.1, вон 4.9, юань 2.8 хувиар тус тус сулрав. Тэгвэл рублийн ханш 8.5 хувиар чангараад байна.
Монгол Улс ФАТФ-ын “саарал жагсаалт”-д орохтой холбоотой мэдэгдлийг 2019 оны аравдугаар сарын 16-нд хийсний улмаас валютын захад богино хугацааны хөөрөгдлийн шинж чанартай бодит бус эрэлт огцом нэмэгдсэн. Үүнээс шалтгаалж бэлэн захын ам.доллар худалдах, худалдан авах ханшийн өсөлт Монголбанкны аравдугаар сарын 17, 22-ны оролцооны үр дүнд тогтворжсон гэж үзэж буйгаа тус банкнаас мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
14 СЭТГЭГДЭЛТЭЙ
|
