АНУ-ын иргэн “Алтай таван богд” ууланд авиралт хийгээд сураггүй болжээ

ОБЕГ-ын хоногийн мэдээллээр, хоёр иргэнийг эрэн хайх ажиллагаа явагдаж байна. 

АНУ-ын харьяат иргэн П, 40 настай, эрэгтэй энэ сарын 18-ны өдөр “Алтай таван богд” ууланд авиралт хийгээд есдүгээр сарын 20-ны өдөр буцаж ирэх байсан боловч одоогоор ирээгүй байгаа тухай мэдээллийг аялал жуулчлалын компанийн ажилтан есдүгээр сарын 21-ний 22:11 цагт Баян-Өлгий аймгийн Онцгой байдлын газарт ирүүлжээ.

Мэдээллийн дагуу тус аймгийн Онцгой байдлын газрын Эрэн хайх, аврах бүлгийн 9 алба хаагч нэг автомашинтай есдүгээр сарын 22-ны өдрийн 05:00 цагт “Алтай таван богд” уулын чиглэлд явж мөн өдрийн 17:30 цагт тус уулын “Хаалт” гэдэг газар очиж хоноод, өнөөдөр өглөө хөдөлгөөнөө үргэлжлүүлсэн байна.

Мөн Орхон голд таван хүн загасчилж байснаас нийслэлийн Хан-Уул дүүргийн харьяат, 36 настай, эрэгтэй живсэн тухай дуудлагыг есдүгээр сарын 22-ны өдрийн 12:47 цагт хүлээн авжээ.

Сэлэнгэ аймгийн Онцгой байдлын газрын 7 алба хаагч нэг автомашин, нэг завьтай мөн өдрийн 13:00 цагаас эхлэн 12 удаа гүний шумбалт хийж, усанд завиар 3 км-т эрэн хайх ажиллагааг зохион байгуулсан боловч үр дүнд хүрээгүй тул 19:00 цагт түр зогсоосон байна. Эрлийг өнөөдөр 08:00 цагаас дахин эхлүүлжээ.

Эх сурвалж: ОБЕГ