Х.Алтанхуяг: Ууланд алхах нь чихрийн шижин, нурууны суултаас сэргийлнэ

Ууланд алхах нь хөдөлгөөний дутагдлаас болж үүсдэг олон өвчнөөс ангижирч, эрүүл амьдралын хэв маягийг бүрдүүлэхэд чухал ач холбогдолтой байдаг ажээ. Тиймээс энэ удаагийн 10,000 алхам булангийн зочноор “Оргил өөд” уулын клубын тэргүүн Х.Алтанхуягтай ярилцлаа.

-Клубээ товч танилцуулахгүй юу. Яагаад ингэж нэрлэсэн юм бэ?

-Манай клуб зургаа дахь жилдээ үйл ажиллагаагаа явуулж байна. Анх зөв зүйлийн төлөө нэгдсэн хүмүүсийг бий болгоё, хамтдаа нийгэмд тустай зүйл хийе, өөрсдийнхөө эрүүл мэндэд анхаарал хандуулъя гэсэн зорилгоор байгуулсан.

Манай клубт насны хязгаар байхгүй. Одоогоор 300 гаруй гишүүнтэй. Найман настайгаас наян настай хүмүүс ч нэгдэж нэг бүлэг болдог. Энэ нь бие биедээ амьдралын туршлагаа хуваалцах, бие биеэсээ суралцах боломжийг олгодгоороо ач холбогдолтой. Нэг ёсондоо ганцаардал гэдэг зүйлээс авардаг.  Бие эрүүл байвал ажил үйлс ч хурдан бүтэж амжилт гаргаж амьдрал илүү сайхан болдог.

Улаанбаатар хотын утаа, чанаргүй хүнсний бүтээгдэхүүний эсрэг хүмүүс сайн дураараа нэгдэж байгаа. Эдгээр нэгдлээс найз нөхдөө олж, нийгэмшиж, чөлөөт цагаа хэрхэн зөв зохистой өнгөрүүлэх тал дээр бие биеэсээ суралцдаг юм. Мөн уул ус, байгаль дэлхийгээ хайрлах сэтгэл, ухамсар бий болдог.

Зөв хүмүүсийн үлгэр дуурайлал, нөлөөллөөр төлөвшдөг гэж хэлж болно. Улаанбаатар хот дөрвөн их хайрханы дунд оршдог учраас уулын аялал зугаалга буюу дотоодын аялал жуулчлал их хөгжиж байгаа. Иймээс дөрвөн хайрхан руугаа алхдаг. Сүүлийн үед шинэ орон сууц, хашаа баригдаад уул руу аялах зарим зам жимийг хаачихсан. Ингэхээр замаа сайн мэддэг уулын клубын хүмүүсийг дагаад аялах боломжтой.

-Танай клубын гишүүд ам­рал­тын хоёр өдрөөр ууланд алхдаг билүү?

-Долоо хоног бүрийн ням гаригт ууланд алхдаг. Хүн ажлын таван өдөр эрч хүчтэй ажиллаад хагас сайн өдөр нь гэр бүлдээ цаг зав гаргаад бүтэн сайнд нь өөртөө зав гаргах ёстой гэж боддог. Тиймээс ням гаригт аяллаа зо­хион байгуулдаг. Бүтэн сайн өдөр цэвэр агаарт алхаад эрч хүчээ нө­хөж шинэ долоо хоногийг угтвал ажилдаа амжилт гаргах боломж нь ихэснэ.

 -Ууланд алхах нь хүний эрүүл мэндэд ямар ач холбогдолтой вэ?

-Ууланд алхах бол хүний эрүүл мэндэд үзүүлэх олон ач холбогдолтой, гайхамшигтай зүйл. Эрүүл мэндийн салбарын судалгаа шинжилгээнээс үүдэн хүмүүсийг ууланд алхахыг их зөвлөдөг болсон. Гүйх нь зүрхний өндөр ачаалал шаарддаг.

Бэлтгэл хийж байгаа тамирчид эсвэл тогтмол гүйгээд дадчихсан хүмүүст гүйх тохиромжтой. Харин бусад хүн алхсан нь дээр. Алхахдаа бага зэр­гийн ачаалал өгч алхах хэрэгтэй. Энэ нь зүрхний хэмнэлд маш сайн. Хө­дөл­гөөний дутагдлаас болж үүсдэг чихрийн шижин, нурууны суултаас сэргийлэх боломжтой. Мөн найз нөхөд, гэр бүлийн халуун дулаан орчин бий болж нийгмийн асуудлаас үүдсэн бухимдлаа мартаж стрессээс ангижрах бүрэн боломжтой.

Монгол Улс өргөн дэлгэр газар нутагтай, сайхан үзэсгэлэнт байгальтай учраас аялж байгаарай. Нийс­лэл хотоос нэг километр хү­рэхгүй зайд ч байгалийн үзэсгэлэнт газар олон байдаг. Энэ давуу талаа бүрэн ашиглаж байгалийн сайхантайгаа танилцаасай гэж хүсч байна. Аялал зугаалгаар явахдаа байгаль орчноо бохирдуулдаггүй зөв сэтгэлгээтэй байгаарай гэж уриалмаар байна.

-Ууланд алхдаг олон клуб байдаг. Танайх ямар онцлогтой вэ?

-“Mongol hiking”, “Уулчин Монгол”, “Хайрхан”, “UB hiking” гэсэн уулын  клуб анх байгуулагдаж байсан. Эдгээрээс хамгийн анхных нь н.Баярсайхан эмчийн байгуулсан “Mongol Hiking” клуб юм. Харин манай клуб ганцхан ууланд алхах биш нийгмийн олон төрлийн үйл ажиллагааг явуулдгаараа онцлог. Мөн клуб хоорондын тэмцээнд идэвхтэй оролцдог.

Эрчимт алхалтын тэмцээнд тэргүүн байрт орж байлаа. “Оргил өөд” клуб анхдугаар их наадмаа “Буянт-Ухаа” спортын ордонд зохион байгуулж байсан. Клубын гишүүдийн дунд жил бүр биллиардын тэмцээн зохион байгуулдаг уламжлалтай. Ууланд аялаад явж байхдаа ч олон тэмцээн уралдаан зохион байгуулж тохирсон урамшууллыг олгодог.

Анх байгуулагдсанаас хойш тасралтгүй зургаан жил явж байгаа идэвхтэн гишүүн олон бий. Нэг удаагийн алхалтад доод тал нь 20 орчим хүн явдаг. Тэр дунд шинээр элссэн, удаан хугацаанд явж байгаа гээд янз бүрийн л хүмүүс байдаг.