СТАТИСТИК: Тавдугаар сард ХДХВ/ДОХ-ын хоёр тохиолдол бүртгэгджээ
Улсын хэмжээнд 2019 оны эхний таван сард 31.7 мянган эх амаржиж, 32.0 мянган хүүхэд төрүүлжээ.
Энэ нь өмнөх оны мөн үетэй харьцуулахад амаржсан эх 174 буюу 0.6 хувиар, амьд төрсөн хүүхэд 188 буюу 0.6 хувиар нэмэгдсэн үзүүлэлт болохыг ҮСХ-ноос Монгол Улсын нийгэм, эдийн засгийн 2019 оны эхний таван сарын статистик мэдээллийг танилцуулах үеэр онцоллоо.
Түүнчлэн ҮСХ-ноос гаргасан эрүүл мэндийн статистикаас харвал, 1,000 амьд төрөлтөд ногдох нялхсын эндэгдэл 2019 оны эхний таван сард 14 болж, өмнөх оны мөн үеийн түвшинд байжээ. Харин тав хүртэлх насны хүүхдийн эндэгдэл 16 болж, өмнө оны мөн үеэс нэг хүүхдээр буурсан байна. Мөн 100,000 амьд төрөлтөд ногдох эхийн эндэгдэл 2019 оны эхний таван сард 22 болж, өмнөх олны мөн үеэс 13 хувиар буурчээ.
Харин халдварт өвчнөөр өвчлөгчдийн хувьд энэ оны эхний таван сард 18.9 мянга болж, өмнөх оны мөн үеэс 1,334 буюу 7.6 хувиар нэмэгдсэн байна.
Үүнд салхин цэцгээр өвчлөгчид 1,754 буюу 45.7 хувиар, цусан суулгаар өвчлөгчид 323 буюу 21.8 хувиар, гонококкт халдвараар өвчлөгчид 198 буюу 9.3 хувиар, сүрьеэгээр өвчлөгчид 46 буюу 2.8 хувиар тус тус өссөн нь голлон нөлөөлжээ.
Түүнчлэн Улаанбаатар хотод 2019 оны тавдугаар сард ХДХВ/ДОХ-ын хоёр тохиолдол илэрч, улсын хэмжээнд бүртгэгдсэн ХДХВ/ДОХ-ын нийт тохиолдол 272 болжээ.
Эх сурвалж: ҮСХ
